Turistang Koreana natagak sa bangka sa Panglao, patay

MUNISIPYO SA PANGLAO, Bohol— Patay  ang usa ka babayeng turista nga Korean national human aksidenteng natagak sa dagat gikan sa usa ka bangkang de motor ug naigo sa sabad niini didto sa kadagatan sa Virgin Island, niadtong miaging adlaw.

Biktima giila nga si Hyangnam Jung, 52 anyos, minyo, lumad sa Korea ug kasamtangang nag-estar sa  Virgin Island resort sa Panglao.

Nahitabo ang insidente mga alas 11:30 sa buntag niadtong Lunes, Pebrero 5, 2018. Sakay ang trese ka Koreanong torista sa  pumpboat sa  Palm Island Tour 2 nga  gitimonan ni Noel Christopher Arboleras.

Una pa man maka plastar ang pumpboat sa Virgin Island,  gipahimangnoan ni Arboleras ang tour guide nga ipatunga  ang mga pasahero sa  bangka aron dili mosayad ang sa ilawom sanglit hunas niadtong higayona.

Matud sa taho nga nakit-an ni Arboleras ang biktima nga nagduwaduwa sa tubig sa dagat. Ug sa dihang gipabalik na sa pagpalingkod ang mga turista, mitindog si Jung ug  nawad-an kini sa iyang balanse nga miresulti sa iyang aksidenteng pagkahagbong dagat.

Nadunggan na lamang nila nga dunay nipaka sa ilalom niini ug gituohang naigo kini sa sabad.

Daling giluwas sa maong kapitan sa pump boat si Hyangnnam nga nakaagum ug samad sa iyang paa. Dali kining gidala sa Borja Family Hospital sa siyudad sa Tagbilaran. Apan sa pagka alas 5:21 sa hapon, gideklarang patay na ni Dr. Apollo Bernaldez. -Alan Andy Nalzaro/Newsline.ph