ANG TEAM sa Visayas-Mindanao mipildi sa mga taga Luzon-National Capital Region sa pinaka-unang Helping Hand Executive Online Chess Challenge miaging semana.
Ang fund-raising nga torneyo, nga gidula niadtong Mayo 5-7 pinaagi sa Lichess
internet chess server, gipasiugdahan sa Philippine Executive Chess Association (PECA) alang sa pagtabang sa mga kabus nga chess player ug coaches sa nasud nga apektado sa coronavirus disease (Covid-19) pandemik.
Pinangulohan ni Sen. Manny Pacquiao, ang Vis-Min midaug batok sa Luzon-NCR, 190-174, sa first round ug 287-244 sa ikaduhang hugna aron makuha ang kampyonato.
Si Jezreel Lopez sa Pagadian City ang migawas nga leading scorer sa Vis-Min.
Siya nakakuha og 28 puntos ug sinundan niEduard Sumergido sa Basilan nga adunay 24 puntos, ug ni Jose Barba Jr. nga adunay 21.
Ang ubang nakatampo sa kadaugan sa Vis-Min mao sila si Ariel Nino Aton (18 pts.), National Master Jonathan Tan (17), ug National Chess Federation of the Philippines executive director Atty. Cliburn Anthony Orbe (16).
Sila si Rocky Pabalan, Ernie Abanco, ug Engr. Nathan Comella ang nidala sa Vis-Min sa ilang kadaugan sa first round.
Si Sen. Aquilino “Koko” Pimentel nakatakda untang modula para sa Luzon-NCR bisan siya taga-Mindanao, apan wala makaapil tungod sa ubang kakulian.
Ang team sa Luzon-NCR gipangulohan nila ni Mark Anthony Yabut sa Pampanga, Engr. Robert Arellano, Dandel Fernandez, Emmanuel Asi, Leonard Raymond Reyes, ug Atty. Cris Aspiras.
Si PECA president Dr. Fred Paez nag-ingon nga ang torneyo nagmalampuson tungod sa pag-apil sa gatusan — 50 gikan Visayas ug Mindanao ug 50 gikan Luzon-NCR — ka mga “chess-playing executive.” (LBG)
