Vlogger nga pulis gipatubag na sa Napolcom sa kaso batok kaniya

DAKBAYAN SA DAVAO — Gimanduan na sa National Police Commission nga patubagon ang policeman-vlogger nga si Francis Steve Fontillas niadtong Huebes, Marso 20, kon nganong dili siya angayng palagputon sa Philippine National Police (PNP) tungod sa pag-post sa iyang mga tirada online batok kang Presidente Marcos.

Sumala sa Napolcom kinahanglan nga isumiter na ni Fontillas ang iyang counter-affidavit sulod sa dili ma-extend nga lima ka adlaw.

Ang mga reklamo sa grave misconduct ug conduct unbecoming of a police officer gipasaka batok kang Fontillas, matud pa ni Napolcom Commissioner Rafael Vicente Calinisan.

“Panahon na nga ipakita ni Fontillas nga maayo siya sa panghuna-huna nga mahimong pulis pinaagi sa pagtubag sa mga kaso nga gipasaka batok kaniya. Ato nang tapuson kini,” ingon ni Calinisan. “Tawo ug atubangon ang mga kaso.”

Ang kapakyas sa bahin ni Fontillas sa pagsumiter og komento nagpasabot nga iyang gi-waive ang iyang katungod sa pagpanghimakak sa mga alegasyon nga gibato kaniya, sumala ni Calinisan.

Nag-viral sa social media si Fontillas nga upat pa lang ka tuig nga polis human niya gisaway si Marcos ug ang PNP sa pagkasikop ni kanhi presidente Rodrigo Duterte niadtong miaging semana.

Si Fontillas wala mohunong sa iyang mga pagbiaybiay sa iyang paggukod kang PNP chief Gen. Rommel Francisco Marbil, Criminal Investigation and Detection Group director Maj. Gen. Nicolas Torre III ug PNP spokesperson Brig. Gen. Jean Fajardo.

Gitarget kagahapon ni Fontillas ang mga television network nga ABS-CBN, TV 5, GMA ug government-owned station nga PTV sa iyang gihulagway nga biased reporting batok niya.

Ang pulis niingon nga mopasaka siyag mga kaso sa cyberlibel batok sa mga television network tungod sa pagtaho nga nag-AWOL siya o nag-absent nga walay leave.

Gibansagan ni Fontillas nga fake news ang maong impormasyon bisan kon ang iyang mother unit, ang Quezon City Police District (QCPD) ang nitaho sa media nga na-AWOL siya sukad niadtong Marso 6.

Gi-post usab ni Fontillas ang mga litrato sa iyang kaugalingon nga nag-angkon nga siya mi-report alang sa katungdanan sa punoan sa QCPD sa Camp Karingal.

Wala motubag si Quezon City police director Col. Melecio Buslig Jr. dihang gipangutana kon nakabalik na ba sa trabaho si Fontillas.

Si Calinisan niingon nga si Fontillas kinahanglan nga magpasusi pag-usab sa iyang kaugalingon sa mga doktor sa kapulisan o bisan kinsang medikal nga propesyonal nga iyang pilion imbes nga mag-post og seditious content sa iyang Facebook account.

Ang QCPD nipasaka og kasong sedition batok kang Fontillas atubangan sa city prosecutor’s office.

Lima usab ka mga reklamong administratiba ang iyang giatubang sa Napolcom ug sa National Capital Region Police Office.

Taliwala sa pagsilaob ni Fontillas batok sa administrasyong Marcos tungod sa turnover ni Duterte ngadto sa International Criminal Court sa The Hague, si House Deputy Majority Leader Paolo Ortega V niingon nga kinahanglang mas estrikto ang PNP sa recruitment policy niini.

Matod ni Ortega nga kinahanglang estrikto ang PNP sa pagpili sa mga sakop sa police organization aron “likayan ang mga insidente nga sama niini.”