DAKBAYAN SA ILIGAN — Wala na kuno naka-agwanta ang usa ka amahan kay gisigihan ug kulata sa iyang anak, hinungdan nga iya kining gitigbas hangtud kini namatay.
Nahitabo ang usa ka madugong kamatayon sa Purok 6, Marangay Mison, Baliangao, Misamis Occidental niadtong Domingo sa alas 7:00 sa gabii.
Sumala ni Lieutenant Melven Denore, hepe sa Baliangao Police, gidunggab ni Dominador Gumahad, 67 anyos, mag-uuma, ang iyang kaugalingong anak nga si Agner Gumahad, 24, walay klarong trabaho, sulod mismo sa ilang panimalay.
Gi-ako ni Dominador atubangan sa kapulisan nga siya ang midunggab ug mipatay sa iyang anak kay dili na kuno niya maagwanta ang pagsige niini ug kulata kaniya.
Napuno ug samad dinunggaban ang patayng lawas sa biktima.
Saysay ni Dominador sa kapulisan, gikulata na usab siya sa iyang anak niadtong domingo sa sayong gabii ug giparok pa ang iyang ulo didto sa ilang kusina, maong wala na kini naka-agwanta ug iya kining gipatay.
“Ingon ang amahan wala na siya nakaagwanta nga permi kulatahon sa anak. Maong nadunggaban ug natigbasan gyud,” saysay ni Denore.
Anaa pa sa kritikal nga kondisyon si Agner ug padayon kining giatiman sa mga doktor sa Ozamiz hospital.
Ang asawa ni Agner mipasaka na ug kasong ‘Parricid’ batok sa iyang ugangan.-Divina Suson
