DAKBAYAN SA DABAW (Mayo 30) — Atubangan sa kapulisan, nagbagutbot ang usa ka ginang kay wala naka ‘pay out’ sa tubo sa iyang kuarta human gipasira sa ang ‘Jogle Investment Scheme’ nga iyang gi-apilan.
Niadtong Mierkules sa buntag, miadto si Annie Tapere, 53-anyos, sa buhatan Jogle didto sa Roldan Village, Barangay Maa, Davao City, apan siya nahikugang kay sirado na ang opisina niini.
Wala diay kabalo si Tapere nga gipadlak na sa kapulisan ang Jogle, kung diin niya gibutang ang iyang Kinse Mil (P15,000).
Si Tapere mamaligya-ay ug karne sa palengke, naaghat nga mobutang ug kuarta sa Jogle tungod sa mga istorya sa iyang mga higala nga naka ‘pay out’ na.
Si Julieta Mongcal, 55, tindira sa gulayan sa pakighinabi sa NewsLine.ph nagbutyag nga ubay ubay sa iyang grupo ang nagbutang ug kuarta sa Jogle ug pipila pa lang ang naka ‘pay out’, gani matud pa niya, ang uban nangutang sa ‘5-6’ aron ibubo sa Jogle.
Tungod niini. doble ang ilang kagoul, magbayad sila sa 5-6 ug daku ang puruhan nga dili na nila makuha ang ilang kuarta sa Jogle.
Sumala ni Police Regional Director Brigadier General Marcelo Morales, ilang gisira ang maong ‘Jogle’ tungod wala kini nakapakita ug papeles kabahin sa ilang negosyo.
Gisaysay ni Morales nga kulang ang mga dokumento sa Jogle.
Apan, mibarog ang representante sa Jogle nga si Janeth Garcia, nga naa kuno silay dokumento ug legal kuno ang ilang negosyo.
Apan sa dihang gipangtaa kini ug Business Permit, wala kini nakapakita.
Matud ni Garcia nasakitan siya tungod kay gitawag ang ilang negosyo nga ‘scam; o pangilad “Naa man mi registration since 2016, hangtud karon wala may nireklamo sa amo, unfair kaayo.”
Ang Jogle, distributor sa usa ka food supplement, ug kini ilang ginahatag sa ilang investors isip hulip sa ilang gibubo nga kapital.
Bisan pa man sa gisaysay ni Morales, miingon si Garcia nga legal gihapon ang ilang negosyo.-Jiann A. Padillo /NewsLine.ph
