DAKBAYAN SA DABAW (Oktobre 18) — Walay nakaako ug atbang sa umaabot nga May 13, 2019 eleksyon, ang tulo ka anak ni Presidente Rodrigo Duterte dinhi sa dakbayan.
Dili lang kini ang unang higayon nga walay mi-atbang sa mga anak ni Duterte. sa milabayng mga eleksyon, sagad walay kaatbang ang iyang mga anak, og kung aduna man-pulos kini wala mga pangalan sa natad sa politika dinhi sa dakbayan.
Si Mayor Sara Duterte, nagpasubli pagka-mayor, ug walay mi-atbang kaniya.
Ang kamanghurang anak nga si Sebastian ‘Baste’ Duterte, maoy ka tamdem sa iyang ate Sara isip Bise Mayor, wala gihapoy kaatabang.
Wala poy mi-atbang sakina-magulangang anak nga si kanhi Bise Mayor Paolo ‘Pulong” Duterte, midaghan pagka-Congressman sa unang distrito.
Kagahapon nahuman ang gitakda sa Commission on Elections (Comelec) nga usa ka semanang filing sa Certificate of Candidacy alang sa 2019 eleksyon.
Apan, sumala sa bag-ong resolusyon sa Comelec, puede magpapuli ang usa ka kandidato una modangat ang alas 12:00 sa udto sa adlaw sa piniliay, apan kining bag-ong resolusyon puede lang sa mga kandidato nga adunay pareho ug apelyido, ug adunay partido, dili kini puede sa mga independent nga kandidato.
Si Baste, natinud-anong mi-ingon sa mga reporters nga wala pa siya’y kabang kaagan sa politika, tungod kay kini ang una niyang pagsabak sa usa ka politikanhong hagit.
Si Bise Mayor Bernie Al-ag ni-iway alang ka kandidatura ni Baste, ug wala na kini nagpapili isip Konsehal sa ika-tulong distrito.
Sa unang distrito, mi-iway ang mag-igsoong Congressman nga si Karlo ug PBA representative Jericho Nograles kang Pulong kay dili kuno nila gusto banggaon ang mga Duterte.
Nagpasubli sa PBA Partylist si Jericho, samtang si Karlo nanaad nga motabang sa administrasyong Duterte inig kahuman sa iyang termino karong Hunyo 30, 2019.-ezc/NewsLine.ph
