DAVAO CITY– Zero kon walay nakumpiska nga mga firecrackers bisan mga gagmayng matang niini sama sa watusi ug sparklers.
Sumala sa Bureau of Fire Protection (BFP) Davao City Fire District nagsige sila ug inspeksyon uban sa nagkadaiyang yunit sa otoridad sa ilang pag-monitor sa mga sidewalk vendors ning Dakbayan, Disyembre 31, 2020.
Si Senior Fire Officer (SFO) 4 Ramil Gillado, ang chief investigator sa Investigation Division sa BFP Davao City Fire District, nagbutyag nga wala silay bisan usa nga nakumpiska.
Nahimong kabahin ang BFP-11 sa mga yunit sa otoridad sa usa ka Task Force sa pagbatok sa firecrackers bisan pa og duna na’y firecracker ordinance ang Davao City.
Matag bulan sa Disyembre ang BFP uban sa kapulisan, okupado sa pagsubay sa mga sidewalks aron maseguro nga walay mosupak sa balaud.
Gisaysay ni Gillado nga usa ang firecracker sa posibleng hinungdan sa sunog diin niadtong Disyembre 31, 2018 usa ka ‘kuwetis’ ang hinungdan sa pag-ulbo sa kalayo nga misunog sa mga balay sa usa ka barangay sa Agdao District.
“DCplinado [Davao City ang katawhan disiplinado] mituman gyud sa atong existing nga city ordinance sa firecracker, pero wala kami nagkompiyansa, amoa gihapon nga gisubay ang mga sidewalks, so far, wala tay na-confiscate, disiplinado gyod ang Dabawenyo,” tipik sa pamahayag ni SFO4 Gillado nga nahinabi sa NewsLine pinaagi sa telepono.
Ang Davao City Police Office (DCPO) wala pa sa’y taho nga gipagula apan sa miaging tuig wala silay nakumpiska.
Dise nuwebe (19) ka tuig na ang Firecracker Ban sa siyudad sa Davao kon ang City Ordinance No. 060-02 of 2002 diin gidili ang paghimo, pagbaligya, pagpang-apud apod, pagkupot, ug ang pagbiyahe sa mga pyrotechnic devices ug eksplosibo sud sa siyudad.
Sa pagka-pangulo ni Pangulong Rodrigo Duterte sa tuig 2016, mibungat kini og pulong nga posibleng matigayon ang firecracker ban sa tibuok nasud, apan ning kasamtangan dunay pa gihapon mga lugar nga usa sa mga nahimong panginabuhian mao ang mga pabuto.
Sa Koronadal City, plano usab sa lokal nga kagamhanan sa siyudad nga mopatuman og total firecracker ban diin ang siyudad sa Davao ang ilang gihimong ihemplo.-Newsline
