DAKBAYAN SA DABAW (Marso 25) — Hugot nga gipanghimakak sa kapulisan sa Dakbayan sa Tagum nga gibombahan sa teroristang grupo ang ilang syudad niadtong Sabado, Marso 23.
Sa opisyal nga sulat pahayag ni Tagum City Police Director Police Superintendent Jefferson Ayban, iyang giklaro nga ang miboto didto sa atubangan sa Livestok Auction Center, doul sa palengke, usa ka ‘mechanical explosion’ ug dili bomba.
Ang miboto, matud pa ni Ayban, usa na makina sa motor nga giparking doul sa maong lugar.
Sa Tagum City Police FACEBOOK account, Giklaro ni Ayban, “Hugot nga gina-deny sa PNP Tagum nga usa ka terrorist activity ang nahitabong insidente kagabii, March 23, 2019 didto atubangan sa Livestock Auction Center sa Tagum City Public Market..”
Tungod sa pagboto, nangabungkag ang piesa sa makina sa motor ug maoy nakasamad sa walo ka tawo, sumala ni Ayban.
Matud ni Ayban, gidala sa hospital ang mga samaron, ug gipagawas dayon kini sa hospital human nga sila na check-up ug natambalan.
“Confident kami nga ibalita sa publiko nga kini dili tungod sa granada o bomba nga maoy gakalat karon sa mga social media sites. Atong gipahimangnoan ang publiko nga mahimong responsable sa pagpakatag ug impormasyon sanglit kini makahatag ug kabalaka sa katawhan,” saysay ni Ayban.
Gani, padayon pang gi-imbistighan ang maong nsidente aron makakuha g dugang detalye ang kapulisan.
Mipagawas ug opisyal nga pahayag ang Tagum PNP huma mikatag sa Social Media nga duna kunoy mibusikad nga bomba sa Tagum City.-jap/NewsLine.ph
