DAKBAYAN SA DABAW — Gilunsad sa probinsyal nga panggamhanan sa Davao del Norte ang ‘Weight Loss Challenge’ niadtong Mierkules, Agosto 9 didto sa kapitolyo.
Ang Weight Loss Challenge, gihimo ubos sa Health and Wellness Program sa kapitolyo, ug kini himoun sulod sa 100 ka adlaw aron mamahimo nang kabahin o regular nga aktibidad sa mga mosalmot ang pag ehersisyo.
Matud ni Giovanni Gulanes, ang Department Head sa Provincial Sports and Youth Development Office (PSYDO), nga tumong sa Weight Loss Challenge ang kaayuhan sa pisikal ug mental na panglawas sa mga empleyado.
“Ang katuyuan jud aning weight loss challenge is para ang mga empleyado mabaskog ug mahimsog. Apil na ani ang mental health kay daghay naboryong karon. Na bored, so aside from getting fit physically, it also helps us psychologically,” sulti ni Gulanes.
Sa panahon sa pandemya, matud ni Gulanes, kinahanglan nga himsog ug maayo og panglawas ang matag-usa .
Dugang niini, nga kung physically fit and psychologically sound ang empleyado, kini moresulta sa mas maayo nga pagkaproduktibo sa trabaho, nga mao ang katuyuan sa pamunuan ni Gobernador Edwin Jubahib.
Ang Weigh Loss challenge molangkob sad sa Zumba, DavNor Capitol Cyclists, ug pagbalik sa DavNor Runners.
Ang bag-ong programa sa pisikal nga kaarang hulip sa tinuig na Capitolympics, nga giapilan sa lain lain nga departamento ang mga naka linya nga aktibidades.
Aron mokwalipikar sa Weight Loss Challenge, kinahanglan sa matag partisipante, ma pa Individual o Group category, nga mutimbang ug 60 kilograms pataas.Sumala pa ni Gulanes na sa matag kilo nga mabawas, makadawat ug P300.00 ang mga partisipante kon asa ang P200.00 gikan sa PSYDO unya ang P100.00 gikan sa Gobernador.
Adunay premyo nga P15,000.00, P10,000.00 ug P5,000.00 alang sa group na category.
