Sugyot ni Piñol : Pondo nga P70-bilyones sa 4Ps gamiton pag-umad sa agrikultura

Posted on

DAKBAYAN SA DABAW (Mayo 27) — Gaplano si Agriculture Secretary Emmanuel Piñol nga hangyoon si Presidente Rodrigo Duterte,  gamiton ang P70-bilyones nga nga pondo sa Pantawid Pamilyang Pilipino Program (4Ps), alang sa livelihood program, ug dili na kuarta ang ihatag sa mga benepisyaryo.

Sumala pa ni Piñol, kuestionable ang programa sa 4Ps, ug naka paubos pa himoun sa kalidad sa panginabuhian sa mga kabos, kay nag sige na man lang hinoun sila ug huwat sa kuarta imbes nga manarbaho aron mabuhi.

“Ako ang pinakasaba anang programa sa 4P’s, nagsige ug gasto ang gobyerno ug P70-bilyones kada tuig, mas daku pa ilang budget kaysa DA,” miluat si Piñol atol sa Agriculture Trade and Investment Forum niadtong Huesbes.

“Akong gina-ingon, ang 4P’s mamahimong usa ka dakong programa aron maka-dungag sa pagpalambo sa agrikultura, kung tarungon ug gamit, imbis nga magsige ug tunol kada buwan, magsugod sila ug panginabuhian gamit ang maong kuarta,” midugang si Piñol.

“Di na mogtrabaho ang mga tawo, maghuwat nalang sa ilang alawans,” midugang si Piñol,  “Gani, sa sulod sa pipila ka katuigan, way maayong resulta ang 4Ps, ang pinakapait, ang mga trabahador sa agrilultura mikonhud tungod ana.”

Apan supak ang mga benepisyaryo sa plano ni Piñol, gani ilang gisaway ang opisyal sa pagpataka ug panghilabot sa programa sa Department of Social Welfare and Development (DSWD), nga wala man gani kuno siyay nahimong maayong programa sa iyang buhatan.

Si Clarita Abakita, 36, byuda, taga North Cotabato , dunay upat ka anak, ug benepisyaryo sa 4Ps sa pakighinabi sa Newsline.Ph nagbutyag “Kanang plano ni Piñol, usa na ka pagbiay-biay namong mga kabus, wala man gani sya nakapataas  sa produksyon sa humay ug mais dinhi sa among lugar? nanghilabot na sab siya sa DSWD, angay nga siya motutuk sa iyang opisina, kaysa magsige sya ug panghilabot sa ubang buhatan.”

Matud pa ni  Rosalita Villarta,  lumad ug taga Davao del Sur “Nagpataka ra na sya ug yawit, nganong hilabtan man niya ang 4Ps? siya mo-paeskuela sa among anak? siya mopalit ug gamit sa eskuelahan? kami, among ginagamit ang 4Ps sa among mga anak, di li sya magbout-bout.”

Ang  ideya sa paghimong livelihood assistance sa pondo sa 4P’s,  gisigihan na kuno ni Piñol ug duso atol sa milabayng Cabinet  miting. Gani, matud pa niya daghan na daw kunong opisyal sa cabinete ang uyon niini.

Nagplano gani si Piñol nga mag-andam ug usa ka memorandum nga ihatag sa President, sa sunod  miting sa Cabinete.

“Ang unod sa akong suwat, nga gamiton ang 4Ps fund alang sa livelihood activities aron motaas ang food productivity,” matud sa opisyal.

Misugyot si Piñol nga mananum ug gulay, lagutmon, ug magbuhi ug mga hayop  ang mga benepisyaryo  sa 4Ps aron  mokita sila.

Ang pagpadagan sa maong programa, gam-an ra kuno ni Piñol ug giya kung pananglitan aprobahan sa Presidente ang iyang plano.

Basi sa rekord sa Philippine Statistic Authority, mikunhud ang  trabahador sa sectok sa agrikultura niadtong milabayng pito ka tuig, kutob niadtong 2017.

Nahibaw-an usab nga daghan sa mga trabahador sa sektor sa agrikultura nanarbaho na sa konstraksyon,   gamay na lang ang nanguma tungod sa padayon nga nagataas ang gastos sa mga magbabaul, ug ang patubig sab sa gobyerno  walay klaro, sa pipila ka lugar, nagbayad gihapon ang mga mag-uuma sa irigasyon.

Si Pascual Mansaya, trabahador sa gumahan, nagbutyag nga nanarbaho na siya sa konstraksyon kay wa nay klaro ang ilang sueldo tungod sa kabarato sa presyo sa goma, “Ug ako sab daruhon ang akong gamay nga yuta, gamay kaayo ug kita kay barato man ang palit, ambot ug unsay plano sa dipartmint sa agrikulture sa amo, murag wala man.”.-Paul Allegre/Newsline.ph

Be informed
  • 76
  •  
  •  
  •  
  •  
    76
    Shares
  • 76
  •  
  •  
  •