DAKBAYAN SA DABAW— Tungod sa ilang pagpataka ug labay sa hugaw gikan sa mga septic tank nga ilang nakolekta, duha sa tawo ang gisikop sa kapulisan sa lungsod sa Sta. Cruz niadtong Domingo bandang alas 6:25 sa gabii.
Sumala sa taho sa Facebook page sa Sta. Cruz PNP, mitawag kanila si Elizardo Bacon, guardya sa usa ka pribadong luna sa Barangay Tagabuli, Sta. Cruz ug misaysay nga dunay truck nga Fuso Canter color itom nga adunay plaka nga YDT 197og naglabay’s hugaw sa tawo sa nahisgutang yuta. Sa dihang iyang gidoul imbis nga makig-istorya, daling misibat ang sakyanan nga dunay duha ka pasahero.
Daling nakig-alayon ang Sta. Cruz PNP sa TF Davao Checkpoint ug naharang ang truck sa Sirawan, Toril District ning dakbayan, nga miresulta sa pagdakop sa mga suspetsado nga giilang sila si si Robert Laquina Alegria, 32 anyos, ulitawo, driver ug Albert Medina Alegria, 35 anyos, minyo, helper ug parehas nga nagpuyo sa Purok 12-A St. John, Brgy 76-A, Bucana, Davao City.
Subay sa imbistigasyon sa kapulisan, ang truck nga gigamit gipanagiyahan sa negosyanteng si Paulino Taño Alegria, tag-iya sa Victory Septic Tank and Plumbing Services.
Gibalhog sa Sta Cruz MPS ang mga suspetsado ug sila mag atubang ug kasong paglapas sa RA 9275 ug RA 9003 o nailhan nga Solid Waste Management Act.
Subay sa balaud, ang tanang hugaw sa tawo nga nakolekta ilabay sa usa ka lugar nga gilatid sa lokal nga panggamhanan, ang labayanan angayan nga silyado aron ang duga’ nga posibleng adunay bakteria dili mohungaw o modagayday sa mga tubig sama sa sapa ug balon.-JAP
