ANG 24 ka mga tawo nga gidudahang nagpakaylap og mga bakak nga balita ug sayop nga impormasyon mahitungod sa coronavirus disease (Covid-19) pandemic gipasakaan na og kaso sa kapolisan.
Si Philippine National Police (PNP) chief Gen. Archie Gamboa nagkanayon niadtong Biyernes, Abril 3, nga duna silay nakit- ang 20 ka insidente sa pagsabwag og fake news sukad nga gipatuman ang enhanced community quarantine sa Luzon niadtong Marso 17.
Pulong pa ni Gamboa lima sa 24 ka suspetsado na ang nadakpan tungod sa giingong pagpaka kahadlok sa katawhan.
“They are among 24 persons named respondents in 32 complaints filed for an inquest or preliminary investigation for violations of the law on Unlawful Use of Means of Publication and Unlawful Utterances under Article 154 of the Revised Penal Code as Amended in relation to Sec 4c4 (Online Libel) and Section 6 of Republic Act No. 10175, or the Anti-Cybercrime Law,” sulti ni Gamboa sa iyang ininglis nga statement nga nakuha sa NewsLine.
Dugang niya nga kasamtangan nang gihimo ang “case build-up” batok sa mga suspetsado sa pinaka bag-o nga fake news sa Facebook nga nagbalita sa giingong pagronda sa kapolisan sa The Medical City ug pagkompiskar sa pipila ka mga personal protective equipment (PPE) sa maong hospital.
Ang management sa The Medical City dali nga nihimakak sa maong taho nga gipakatap sa pribadong chat group nga Chevening Alumni-Ph.
Gisubli ni Gamboa nga ang “disinformation” o fake news dili makatabang sa gubat kontra Covid-19.
Iyang gihangyo ang katawhan nga susihon una kung unsa ka tinuod ang mga balita ug impormasyon nga ilang makita sa internet ug suta-on ang kredibilidad sa tinubdan sa maong mga balita.
“Fake news deserves to be ignored and not passed on to others (Dili angay’ng tagdon ang fake news ug dili ipasa sa uban),” he said.
Ang mga makalapas sa balaod mag-atubang og usa hangtud unom ka bulan nga pagkapriso ug makabayad og P40,000 hangtud P200,000 nga multa. Sila usab pagasilotan ubos sa Cybercrime Prevention Act of 2012.
Mapasakaan pud sila’s kaso tungod sa pagsupak sa Presidential Decree No. 90, nga naghimong illegal sa paghimo og tabi-tabi (Unlawful Rumor-Mongering) ug pagsabwag og bakak nga impormasyon (Spreading False Information) nga makamugna og kahadlok o kagubot sa katawhan ug makapahuyang sa estabilidad sa gobyerno.
Ang PNP, sa sayo pa, nimugna og task force batok sa online fake news nga may kalabot sa Covid-19. Ang task force maoy mogukod sa mga tighimo og Covid-19 fake news sa internet.
Kung kadudahan ang usa ka balita, ang maayong buhaton, sugyot ni Gamboa, mao ang pagkumpirmar niini sa mga tinubdan sa gobyerno.
Ang Joint Task Force Covid Shield ma-kontak sa mga mosunod nga hotline numbers: 09175382495 – Globe, 09988490013 – Smart, ug sa 02 87253176 – landline. Mahimo usa silang mahinabi pinaagi sa email sa ncovmonitoring@gmail.com.
