DAKBAYAN SA MATI, Davao Oriental (Febrero 12)— Tulo ka bata sa Sitio Sampaloc, Barangay Santo Niño, Mati City, ang naugdaw sa sunog nga nahitabo niadtong milabayng Biernes, February 8.
Sumala sa mga silingan, nakulong ug wala na makagawas sa ilang balay ang mag-igsoong Ahmily Earl Halipa, 10, og Chris Herish Halipa, 3, og ilang ig-agaw nga si Alicia Denise Halipa, 8.
Ang kalayo nga misilaab alas 11:30 sa gabii, 25 ka balay ang giayong gilamoy sa sunog, nga mi-apekto sa kapin gatos ka residente. Gibana-banang mokabat sa P1.5-milyones ang danyos.
Sumala ni Mati City Fire Marshall Senior Inspector Christian Cena, migawas sa ilang inbistigasyon nga naay linya sa kuryente nga misiga ug daling mi-ulbo ang kalayo.
Saysenta ka pamilya ang nawad-an og balay sa upat ka oras nga sunog.
Dali-daling nang apud-apod ug pagkaon si Governor Nelso Dayanghirang kuyog ang mga personahe sa Social Services Department sa gym, kung asa temporaryong gipahaluna ang mga nasunugan.
Nanghatag ug P3,000 nga cash ang probinsya, ug uban pang mga kinahanglanon sa mga nasunnugan.
Aduna usab gihimo nga stress debriefing ang Philippine National Red Cross sa mga biktima.
Basi sa taho sa Bureau of Fire, 44 ka balay ang naugdaw sa sunog samtang adunay duha nga wala naugdaw.
Misaad si Dayanghirang nga mohatag ug P10,000 sa mga residente nga naugdaw ang balay, g P5,000 para sa mga wala naugdaw.
Ang pamilya sa mga bata, tagaan usab ug tag P10,000 kada biktima.-Jiann A.Padillo/NewsLine
