MOKAPIN sa 50 ka Filipino nga mitambong sa Tabligh didto sa Malaysia ang natakdan sa coronavirus disease (Covid-19).
Kini ang gitaho ni Charles Jose, ang Philippine ambassador sa Kuala Lumpur, atol sa Laging Handa briefing niadtong Biyernes, Abril 3.
Sumala pa ni Jose nga ila nang gi-monitor ang 55 ka Filipino nga nagpositibo sa Covid-19, ug ang 54 niini gikan tanan sa Pilipinas aron pagtambong sa Tabligh, usa ka dako nga panagtigum sa mga Muslim.
“We are monitoring 55 Filipinos who tested positive for Covid-19, and all, except one, came from the Philippines to attend a Tabligh gathering,” sulti ni Jose.
Sa maong 55 ka Filipino sa Malaysia, 46 niini kasamtangan nang gitambalan, samtang ang siyam nangaayo na.
Gipasalig ni Jose nga ang embahada sa Malaysia motabang sa pagpauli sa mga pasyente human sila nga matambalan.
Ang embahada kada adlaw nga nag-monitor sa kahimtang sa mga pasyente nga giatiman karon sa mga publikong hospital sa Kuala Lumpur.
Sa laing bahin, ang 24 ka mga Filipino nga na-stranded sa Kuala Lumpur nakatakdang makauli na sa Pilipinas karong semanaha sakay sa usa ka Malaysian Airlines flight.
Ang maong flight mao usab ang sakyan pauli sa mga Malaysian nga na-stranded diri sa Pilipinas.
Sa susamang higayon, gihimakak usab ni Jose ang mga taho nga gi-discriminate ang mga taga ubang nasod didto sa Malasia.
Matud pa sa ambassador, wala’y problema ang mga foreigner sa pagkaon ug sa ilang batakang panginahanglan.
“Wala pong nagaganap na discrimination dito sa Malaysia laban sa mga foreigners pagdating sa pagbili ng mga goods sa supermarket at ibang tindahan,” sumala ni Jose.(with PNA)
