DAKABAYAN SA ZAMBOANGA — Gitadtad hangtud namatay sa iyang kaugalingong anak ang usa ka 72-anyos nga inahan didto sa Alas-as drive, barangay Purok -1 Brgy Sinunuc, kagahapon.
Nakit-an na lang sa mga residente ang patayng lawas ni Alona Nur del Birut nga gilabaya sa kasagbutan nga gisulod og dakong plastik bag.
Sumala sa mga testigo, nakit-an nila ang anak ni Alona nga si Dondie Al-Shariff Nur del Biet, 46 anyos nga nagguyod ug usa ka dakung bag pagawas sa ilang balay ug nagbitbit ug sundang mga alas dos sa hapon paingon sa kasagbutan.
Gisaysay sa ga testigo sa kapulisan, nga nagduda na sila nga dunay dili maayong panghitabo sa balay ni Alona kay wala na nila nadungan ang iyang tingog.
Ilang gi-adto ang kasagbutan nga gidalhan sa saku ug didto nila nakita ang patayng lawas ni Alona, ug gilayon nila kining gisumbong sa kapulisan.
Gi-adtuan dayon si Dondie sa ilang balay ug gihangyo sa kapulisan nga mosurender, apan nagmagahi kini ug naabtan na lang ug tulo ka oras, wala gayud kini migawas.
Nagdesisyon ang kapulisan nga sudlon ang balay aron ipasurender ang maong suspek, apan sa dihang nakit-an na niya ang pulis, iyang gi-aksyunan ug kuha ang pistola, butang nganakapa-aghat sa kapulisan nga pusilon ang biktima ug, hinungdan sa iyang hinanaling kamatayon.-Maebel Perez/NewsLine.ph
