DAKBAYAN SA DABAW (Enero 21) —  Gibisita ni Presidente Rodrigo R. Duterte kagabii ang haya sa tag-iya sa SM Group nga si founder Henry Sy.
Si Sy, usa ka iladong negosyante nga nagsugod isip yanong mamaligyaay ug sapatos, apan iyang napalambo ang iyang negosyo, namatay niadtoong Sabado Enero 19.
Miabot si Duterte sa Heritage Park bandang 10:30 sa gabii aron paghatag sa iyang respesto og pahasubo sa iyang gikonsiderang amigo.
Nagpasalamat usab si Duterte sa pamilyang SY sa ilang tampo sa ekonomikanhong kalambuan sa Pilipinas, tungod kay ang ilang negosyo nakahatag ug daghang trabaho sa mamumuong Pilipino.
Si Sy mitabok sa Pilipinas niadtong bata pa siya ug iyang napalambo ang iyang negosyo, gani siya giila nga pinakadatu nga negosyante sa Pilipinas niadtong 2005 hangtud 2018, og ika 52 nga pinakadatu sa tibouk kalibutan, sumala sa Forbes Magazine.
Nagsugod si Sy ug negosyo nga sapatos niadtong 1958, ug nakatukod na siya ug 70 ka Malls sa Pilipinas, lahi pa niini ang iyang pito ka mall sa China.—Winkle Mae Tabuclao/NewsLine.ph
