DAKBAYAN SA DABAW — Hingpit nang gidawat sa Philppine Army reservist ang aktor nga si Matteo Guidicelli ang rangko isip ikaduhang tenyente sa army.
Gipirmahan ni Presidente Rodrigo Duterte ang papel ni Guidicelli aron pormal na kining mamahimong membro sa Armed Forces of the Philippines, Philippine Army ug adunay rangko nga ikaduhang tenyente Agosto 7.
Sa usaka seremonya didto sa Philippine Army headquarters sa Fort Bonifacio, Dakbayan sa Taguig, nga gipanguluhan ni Philippine Army commander, Lt. Gen. Macairog S. Alberto, gitaud sa singer nga si Sarah Gerenimo ang insinya nga nagsimbolo sa rangko sa aktor.
Si Guidicelli usa ka ‘reservist’ sa army ug giila ang iyang bluntaryong pagtabang sa kasundaluhan aron mamahimong impresaryo ug sumbanan sa mga kabatan-onan nga ilang mahalon ug serbisyuhan ang nasud.
Giidolo si Guidicelli sa kabatan-onan labina sa mga taga-Mindanao. Mipailawom usab sa Scout Ranger Orientation Course ang aktor niadtong Hunyo.
Matud ni General Alberto, gikinahanglan nila ang usa ka tawo sama ni Guidicelli nga makasabot, nakasinati ug makasaysay sa tinoud nga kinabuhi sa sundalo aron makita sa kabataan ang tinoud nga hulagway sa sundalo dili lamang pinaagi sa media.
Kuyog kang Geronimo ang pamilya sa aktor atol sa seremonya.
Sa iyang pagpamulong, nagpasalamat ang aktor sa kasundaluhan nga gitagaan siya ug higayon nga isangyaw ang mensahe sa kalinaw aron usab iyang mapakita ang mga sakripisyo sa mga sundalo alang pagdepensa sa nasud.
“Himuon naku ang kutob sa akong makaya isip usa ka Filipino ug membro sa army reserve nga masangyaw sa kabatan-onan ug sa katawhan ang importansya sa usa ka sundalo alang sa nasud,” saad sa aktor.-jap/NewsLine.ph
