PIKIT, NORTH COTABATO– Padayon ang imbistigasyon sa kapulisan dinhi aron mailhan ang mipusil patay sa usa ka estudyante niadtong Huebes, Oktubre 10, alas 8:20 sa buntag.
Sumala ni Police Captain Mautin Pangandigan, ang hepe sa kapulisan, ila pang gituki ang posibleng motibo sa kamatayon ni Rasul Sabaan, 19 anyos, nagpuyo sa Barangay Talitay sa Pikit ug estudyante sa Cotabato Foundation College of Science and Technology (CFCST) – Pikit Campus.
Ang biktima nagalakaw sa national highway paingun sa ilahang eskwelahan sa dihang kini giduulan ug gipusil sa makadaghang higayon sa wala nail-hi nga lalaki.
Nakaangkun si Sabaan ug daghang samad sa bala sa iyahang lawas nga mao ang hinungdan sa iyahang kamatayon. Human himua ang krimen, niikyas ang lalaking nagpusil paingun sa direksyon sa Barangay Balatican, sakop gihapon sa Pikit, sakay sa usa ka motorsiklo.
Gidala pa si Sabaan sa Cruzado Medical Clinic nga naa sa Poblacion Pikit apan gideklara kini nga dead-on-arrival sa nag-atiman nga doktor.
Sumala ni Pangandigan, padayon pa ang ilang imbistigasyon sa kaso ni Sabaan.
Gani, daghan pang kaso sapagpamatay ang padayon pang gihimu-an ug imbistigasyon. –Taher G. Solaiman
