DAKBAYAN SA DABAW — Patay gilayon ang usa ka mag-uuma nga nanguha ug baki sa dihang nahulog kini sa mismong Kiminlao Waterfall didto sa Barangay Salapawan, Paquibato District, niadtong milabaynng gabii, Pebrero 27.
Sumala sa taho sa Paquibato Police, mitawag kanila si IMPR Datu Rudy Adang ug nagpahibato nga dunay nahulog sa waterfall niadtong Huebes sa hapon, Pebrero 28.
Sa dihang gisuta sa pulis ang lugar, nahibaw-an sa otoridad, nga bandang alas 9:00 niadtong Pebrero 27, namaki ang biktimang si si Darwin Torres Rasay, 42, molupyo sa Lubogan , Toril, ug ang iyang higala nga nailhang si Jimmy Onsad-Man-olugan, 24, molupyo sa Purok 1, Brgy. Salapawan, Paquibato District.
Migawas sa imbistigasyon sa kapulisan, Nagbaktas ang duha og usa ka kilometro aron manguha ug baki didto sa waterfall, ug samtang nagsige sila ug panakop, usa ka baki ang gigukod ni Rasay paingon sa bungtod nga dangog, ug nahulog kini didto paingon sa 30-metros katas-on nga waterfall, nga miresulta sa iyang kamatayon.
Anaa sa Rivera Funeral Parlor sa Licanan, Panabo City ang patayng lawas sa biktima.
Gitambagan sa kapulisan nga pamilya nga ipalawom sa otopsy ang patayng lawas sa biktima aron masuta kung duna bay “foul play” kon dili maayong panghitabo nga miresulta sa kamatayon niini.-Jiann A.Padillo
