GIPASPASAN na sa mga health personnel ang pagpangita sa mga sabongero nga mga taga Gen. Santos City nga miapil sa derby sa Davao City sa miaging bulan.
Sumala sa mga kadagkuan sa Department of Health sa Region 11, gikan sa maong derby ang tulo ka tawo nga nangamatay tungod sa impeksyon sa coronavirus disease (Covid- 19).
Si Dr. Rochelle Oco, acting head sa Gen. Santos City Health Office, nisulti
niadtong Huwebes, Abril 2, nga duna na sila’y pito ka sabongero nga nasubay nga
ni-apil sa maong derby base sa mga impormasyon nga ilang nadawat gikan sa mga
nabalakang silingan.
“We were able to identify some of them based on information coming from concerned
residents that were relayed through our hotlines and the online tracking that we
have done,” sulti ni Oco sa mga tigbalita.
Usa sa pito ka sabongero nga nakit-an gikonsiderar na nga patient under
investigation (PUI) ug naa na karon sa usa ka tambalanan human kini nagpakita og mga
sintomas sa Covid.
Sa laing bahin, ang ubang unom ka sabongero naapil na sa listahan sa mga
persons under monitoring (PUM) ug kasamtangang gi-obserbahan sa mga barangay
health emergency response team sa ilang tagsa-tagsang lugar.
Sa sayo pa, adunay listahan nga nigawas sa social media nga naglakip sa sobra usa ka
dosenang pangalan sa mga sabongero nga mga taga Gen. Santos ug kasikbit nga mga lugar nga gikatahong ni-apil sa “Araw ng Dabaw 6-Cock Derby” didto sa New Davao Matina Gallera niadtong Marso 6-13.
Pipila ka mga sabongero nga taga Davao ug laing lugar nga nitambong sa maong derby
nagpositibo sa Covid19.
Si Gen. Santos city administrator Arnel Zapatos, misaad nga padayon nilang subayon
ug pangitaon ang ubang sabongero nga ginganlan sa maong listahan.
Matud pa ni Zapatos, nga nangayo na sila og tabang sa ubang mga sabongero aron
madali ang pagsubay sa mga tawong hingtungdan.
Dugang ni Zapatos nga importante kanila nga makit-an ang tanang naa sa listahan
aron sila ma-monitor ug dili makatakod sa uban kung magpositibo sila sa virus.
(NewsLine kauban ang PNA)