DAKBAYAN SA DABAW —-Subling gipahibalo ni Davao City Mayor Sara Duterte-Carpio sa katawhan ning dakbayan nga walay libreng tabang medical alang sa mga tawo nga matakbuyan sa coronavirus tungod kay milapas kini sa protocol sa Enhanced Community Quarantine (ECQ).
Sumala ni Duterte-Carpio, iya nang gimanduan si Dr. Leopoldo Vega, hepe sa Southern Philippines Medical Center nga dili tagaan ug libreng tambal ang mga natakdan sa coronavirus tungod sa ilang paglatagaw atol sa ECQ.
Gibalikbalik sa mayor nga bisan pa man nga gipailawom na sa ECQ ang dakbayan, daghan gihapon kaayong pribadong sakyanan ang nagdagan ug bisan pa man sa gitakdang curfew, daghan ang wala motuman.
Mahibaw-an sa mga otoridad ang mga natakdan sa ilang paglatagaw atol sa ECQ, atol sa ilang interbyu sa hospital, tungod niini dili sila tagaan ug libreng tambal, kay ilang gisupak ang kamanduan.
Gibarogan ni Duterte-Carpio “Kung natakdan ka og Covid-19 tungod nag-violate ka sa Enhanced Community Quarantine, dili mobayad ang city government sa imong pagpahospital.”
Matud sa mayor dili niya masabtan nganong daghan kaayong mga pribadong sakyanan ang nagdagan bisan dunay ECQ, nga unta limitado na man ang paggawas sa mga residente sa ilang panimalay.
Sa obserbasyon sa mayor, dili tanang trabahador sa mga supermarket dunay nindot nga mga sakyanan, apan, sa iyang nakita, daghana og mga mahalon nga sakyanan ang anaa sa mga supermarket.
Sa mga mosupak ug matakbuyan sa coronavirus, magamit nila ang ilang Philhealth apan dili mohatag ug hinabang ang lokal nga panggamhanan sa ilang hospital bills.
Kay matud ni Duterte-Carpio, kaya man gani nila mopalit ug gasolina aron magtuyok atol sa ECQ, busa angay usab nga ilang pangandaman ang ilang hospital bill, kung sila matakbuyan sa coronavirus.-Jap/NewsLine
