DAVAO CITY — Ang opisina ni Senator Christopher Lawrence “Bong” Go bag-ohay lang nga mipahigayon sa paghatag sa ayudang bugas para sa mga frontliner ug ubang empleyado sa Southern Philippines Medical Center (SPMC).
Ang maong donasyon gi-endorso sa pamunuan sa SPMC nga gipangulohan ni Dr. Leopoldo Vega, ang medical chief sa maong tambalanan.
Ang SPMC ang usa sa mga referral hospitals sa nasud nga maoy motan-aw ug mo-atiman sa mga pasyente nga adunay coronavirus disease (Covid-19).
Aduna kini’y mga 450 ka empleyado nga naglakip sa mga doktor, nars, medical technologist, attendant, guwardiya, janitor, ug uban pa, nga maoy makabenepisyo sa mga donasyong bugas.
Gawas sa bugas, gi-turn over usab ngadto sa SPMC ang usa ka unit sa non-invasive ventilator nga adunay humidifier ug heated tube.
Ang maong makina gamiton alang sa mga pasyente nga adunay “severe” respiratory infection ug naglisod na og ginhawa.
Usa usab ka ventilator ang ihatag ngadto sa Davao Regional Medical Center sa Tagum City, Davao del Norte.
Matud pa ni Go, ang mga donasyon gikan sa mga pribadong indibidwal ug institusyon nga gipaagi lang sa iyang opisina.
“Bilang taga-Davao, sinikap ko rin lang magpaabot ng tulong… kontribusyon lang ito mula sa mga kaibigan at kapwa nating Pilipino na ipinadaan sa akin para matulungan ang mga Dabawenyo,” ingon sa senador.
“Gikan ni sa atong mga kapwa Pilipino. Dili na importante kung asa gikan. Ang importante nga moabot (sa mga beneficiary),” dugang ni Go.
Sukad sa pagsugod sa Covid-19 outbreak sa Pilipinas, ang opisina sa senador padayong nagtabang sa katawhan pinaagi sa pagdawat sa mga donasyon gikan sa pribadong sektor ug paghatod niini ngadto sa mga kinahanglan tabangan.
Kadaghan na usab makahatag ang opisina ni Go sa mga medical supply nga gi-donar alang sa uban pang mga tambalanan, institusyon, ug mga frontliner sa Davao.
Ingon ang senador nga mapasalamaton kaayo siya sa mga indibidwal ug pribadong grupo nga nanghatag og mga donasyon alang sa mga frontliner ug mga tambalanan nga anaa sa mga probinsiya.
Dugang pa niya nga ang hinabang nga gihatag sa mga kawani sa SPMC usa lamang ka gamay’ng pasidungog alang sa ilang dedikasyon ug mga sakripisyo sa pagtabang sa mga pasyente, ilabi na kadtong naapektuhan sa Covd-19, sa dakbayan sa Davao.
“Karong panahon sa krisis, ang gobyerno ug ang pribadong sektor kinahanglang magtinabangay alang sa pagsumpo sa nagkadakong hulga sa Covid-19. Magbayanihan po tayo,” awhag ni Senator Bong Go. (LBG)
