DAKBAYAN SA OZAMIZ -Gipailawom karon sa quarantine ang tanang sakop sa kapolisan sa Tudela Misamis Occidental human mag positibo sa COVID19 ang Rural Health Nurse sa lungsod.
Gipahayag ni PCAPT Alibsa Deraba, bag ong Hepe sa Tudela MPS nga karong buntag siya ug ang iyang team ang gidestino sa Tudela samtang gi quarantine sulod sa 14 ka adlaw ang mga pulis nga adunay close contact sa nasangpit nga nurse.Gisayay ni Deraba nga ang kadaghanan sa mga pulis nga temporaryong gi assign sa Tudela gikan sa 2nd Provincial Mobile Force ug may uban usab gikan sa ubang police station.”
Ang tanan nga naasign diri ang giquarantine kay in close contact man sila sa nurse nga positive and kami diri maoy gipuli” pamahayag ni Deraba.Ang mga pulis Tudela gi quarantine karon sa OVERVIEW resort .
Walay makabisita kanila, dili pagawson ug sila gibantayan usab og sakop sa PNP.Sa iyang kabahin, gikompermar usab ni Tudela Mayor Samuel Parojinog nga gawas sa tanang pulis gi quarantine usab ang tanang nurse ug doktor nga naasign sa RHU Tudela.
Mismo si.Mayor Parojinog ang nag self quarantine usab kay in close contact siya sa nurse.” Giquarantine nato ang tanang police apil na ang atong mga nurse ug ang doktor nga naasign sa RHU. Hasta ato mga pulis tanan kay aron maseguro nato mao nga mga bag-o na ang pulis karon sa Tudela.” pasabot ni Parojinog.
Nasayran nga ang maong nurse maoy nag atiman sa pasyenteng taga Tudela nga namatay nga nag positive sa.COVID 19 sa ikaduhang testing apan nag negative sa ikatulong test.
Ang RHU nurse ang bag ong COVID 19 positive sa Region 10 ug siya ang ikatulong COVID19 positive sa Misamis Occidental.Unang nag positive sa lalawigan ang seaman nga taga Jimenez apan naka recover samtang ang ikaduhang positive patient ang taga Upper Centro Tudela nga namatay sa wala pa moabot ang resulta sa iyang 3rd test nga negative ang result.
Subay niini nanawagan si Mayor Parojinog ngadto sa tanan nga kanunayon ang pag ampo ug sundon ang mando nga mag sul ob og face mask ingon man kanunayon ang social distancing aron makalikay sa coronavirus.-Thata Roxas
