DAKBAYAN SA DABAW —Gi-warningan ni Mayor Sara Duterte-Carpio ang mga purok liders ning dakbayan ang dili manghilabot sa mga rasyon ug kuarta nga gigahin sa gobierno nga rasyon alang sa ga kabus nga naapektuhan sa hulga coronavirus-19 (Covid-19).
Sa iyang programa sa DCDR namulong si Duterte-Carpio “Mag remind ko sa atong mga purok leader. This is not the time para mangwarta ug palisdan nimo ang isig ka tawo.”
Sumala sa Mayor dili karon ang panahon “Na ipiton nimo ang kauban nimo dinha sa communties nga naglisod tungod sa atong Covid-19 situation. Lahi ang politika, lahi ang government service. Dili lang ka para sa isa, sa duha o amigo nimo, kundi ikaw purok leader pud ka para sa imong kaaway. You follow my lead (sunda ninyo ang akong ingon)”.
Midugang ang Mayor “Wala mi gipili bisan dili namo kaalyado ang kapitan sa among pamulitika, gihatagan gihapon namo kung unsay ginahatag namo sa mga barangay captain nga kauban namo sa politika.Dili ni ang tamang panahon to play politics.”
Mipagawas ug warning ang mayor, tungod kay daghan na kaayo ang nagyawyaw ug nagreklamo nga dunay gipaboran ang ubang purok lider ug ang dili doul sa ilang dughan ilang gikalimtan sa mga rasyon nga gihatag sa lokal nga panggamhanan.
Ubay-ubay na sab ang mireklamo nga dili tagaan sa ubang purok liders ang dili nila suporters, tungod niini, nagpahimangno ang mayor nga angayon ang grasya nga itunol sa mataag pamilya subay sa giya sa panggamhanan.-Jiann A. Padillo
