DAKBAYAN SA DABAW — Upat ka pribadong hospital ning dakbayan ang giandam karon sa lokal nga kagamhanan aron mamahimong kahatdan og mga coronavirus disease (Covid-19) nga pasyente sa panahon nga mapuno na ang Southern Philippine Medical Center (SPMC).
Sa iyang pakighinabi sa Davao City Disaster Radio karong Miyerkules, Mayo 13, si Mayor Sara Duterte nag-ingon nga nakigtagbo na sila sa mga kadagkuan sa upat ka tambalanan aron kini makapangandam sa pagdawat og mga pasyente sa Covid-19.
Hinuon, wala panganli ni Mayor Sara ang upat ka mga hospital nga posibleng mahimong “backup” Covid-19 treatment center.
Giklaro usab sa Mayor nga kining upat ka tambalanan dili pa mahimong modawat og mga Covid-19 nga pasyente hangtud nga aduna pa’y bakante sa SPMC.
“We have identified three and then karon four na. Gidungagan nato og isa pa ka private hospital. Reserved private hospital lang ni sila, meaning, dili gihapon sila pwede modawat og Covid-19 patient until na dili mapuno nato ang SPMC,” gipasabot sa mayor.
“Lisod kung maghulat ta nga mapuno ang SPMC unya dira pa nato ipaandam ang mga hospital, unya magkulang napud ilahang gamit,” dugang ni Duterte.
Sa pagka karon, moabot na sa 161 ang mga kumpirmadong kaso sa Covid-19 sa Davao City ug 23 niini ang mga namatay, samtang 81 ang mga naulian.
Ang Davao City gikatakdang ipaubos na sa General Community Quarantine (GCQ) gikan sa Enhanced Community Quarantine karong Sabado, Mayo 16. (LBG)
