DAKBAYAN SA KIDAPAWAN —– Sikop ang sa otoridad sa sulod mismo sa iyang balay ang usa ka babayeng gisuspetsahang dakong personalidad nga nagpaluyo sa operasyon sa ilegal nga druga didto sa lungsod sa Makilala niadtong Mierkules.
Giila ni Lt. Col. Lino Capellan, tigpamaba sa PNP-12 ang naarestong suspek nga si Joellyn Tan Monleon, 25, taga Barangay Poblacion, Makilala.
Naaresto si Monleon sa mga operatiba sa Makilala polis ug Philippine Drug Enforcement Agency (PDEA) sulod sa iyang balay human kini napalitan ug ‘shabu’ didto mismo sa iyang panimalay.
“Pagdawat ni Monleon sa kuarta nga gibayad kaniya, gidakop dayon siya sa mga operatiba,” saysay ni Capellan.
Nakuha sa kamot sa suspetsado ang minarkahang kuarta nga P1,000 ug lima ka paketeng ‘shabu’ nga mobalor og P10,000
Dugay nang gitiktikan ang mga aktibidad ni Monleon, sumala ni Capellan.
Si Monleon ang nanguna sa listahan sa pulis ug sa PDEA nga personalidad nga nagpaluyo sa druga.
Mag-atubang si Monleon ug kaso sa pagsupak sa RA 9165 or the Comprehensive Dangerous Drugs Act of 2002.-JAP
