DAKBAYAN SA DABAW — Naigo sa tiil ang usa ka negosyante sa dihang misulay kini og sibat sa gihimong drug bust operation sa Tagum City, alas 5:30 sa hapon niadtong Martes, Septiembre 8.
Sumala ni Police Lieutenant Colonel Ronald Lao, Hepe sa RPDEU-RSOG XI ug sa Talomo Police Station, ang suspetsado nga si Ringo Calzada napusilan sa tiil kay misulay ug sibat atol sa drug bust operation sa mga sakop sa RPDEU-RSOG XI ug Talomo Police Station kauban ang Tagum Police Station sa Purok 6, Barangay San Miguel.
Saysay ni Lao “Napusilan siya kay midagan siya padulong sa iyang pick-up, unya naa didto ang usa ka operatiba, maayo nalang kay naka-ambak sa iyang sakyanan ang pulis.”
Napalitan si Calzada sa mga otoridad ug usa ka pakete sa gituohang shabu nga nagkantidad ug 15,000 pesos.
Nakuhaan sab kini ug laing tulo ka mga pakete sa illegal nga druga sa iyang posisyon.
Gibana-banang site (7) gramos gibug-aton sa ‘shabu’ nga nakuha ug nagkantidad ug 84,000 pesos.
Ubay-ubay na usab ang mga nasikop sa otoridad nga mga tulak ug shabu sa nahisgutang syudad, apan daghan gihapon ang nagpadayon sa ilang ilegal nga negosyo.-Rosemarie ‘Cheche’ Diarbodo/Newsline.ph