DAKBAYAN SA OZAMIZ — Gisuspenso og unom ka bulan ang barangay kapitan sa Labo human masuta nga nakahimo kinig kalapasan sa pagpang-apod-apud sa Social Amelioration Program( SAP ) financial assistance.
Adunay nakitang ebidensya batok kang Kapitan Titus” Bobong” Navarro, hinungdan nga ipailawom kini sa unom ka bulan nga preventive suspension.
Sa balaud sa Ombudsman, ang tanang ipailawon sa preventivesuspension dili puede modawat sa ilang sueldo.
Ang pagsuspenso kang Navarro, gipakanaug sa Konseho ning dakayan niadtong Biernes, Septyembre 18,2020.
Sa imbestigasyon nga gihimo sa mga lokal nga magbabalaod sa Ozamiz, nahibaw-an nga gi-apil og lista ni Navarro ang napulo (10) ka mga pamilya nga dunay 27 ka mga benipisyaryo nga maapil sa SAP bisan pa man sila dili kualipikado.
Naapil sa mga benepisyaryo sa SAP ni Kapitan ang iyang apohan, asawa ug bana sa mga sakop sa BPAT ug BHW, bugtong anak nga lalaki o babaye nga makadawat og says mil (P6,000) pesos matag usa.
Napulo ka mga konsehal ang mipabor , duha ang absen, samtang si Konsehal John Docdor kinsa mibarog nga complainant sa maong kaso, wala moapil sa botasyon aron malikayan ang ‘conflict of interest’ .
Gipahayag ni Majority Floor Leader Marcelian Tapayan, nga lig-on ang mga ebidensiya batok kang Navarro nga siya nakahimo og kasaypanan nga mokutay sa Serious Dishonesty, Grave Misconduct, Abuse of Authority ug Conduct Prejudicial to the Best Interest of the Service, nga mamahimong hinungdan sa pagtaktak kaniya sa serbisyo.
Nasayran nga sa nakalabay nga September 10, nangayo og pasaylo sa makadaghang higayon si Navarro ngadto sa mga magbabaalod sa siyudad subay sa iyang nahimo atol sa SAP distribution, apan, mipatigbabaw ang ngipon sa balaud ug nadesisyonan nga isuspenso kini.
Si Navarro ang ikaduhang kapitan sa Ozamiz nga gisuspenso sulod sa unom ka bulan gumikan sa SAP.
Una nang nasuspenso si Banadero Barangay Captain Shiela Marie Parojinog Agonoy tungod gihapon sa irigularidad sa pagpanghatag sa SAP financial assistance.
Una niini, gipahayag ni Mayor Fernando Sancho “ Ando “ Oaminal nga dili siya motugot nga adunay mga kapitan nga magbinoang diha sa pagpanghatag ug ayuda ngadto sa katawhan.
Giklaro ni Oamninal nga ang iyang administrasyon dili mouyon sa binuhatan nga palusot kay alang kaniya walay kausaban ang siyudad kon dili mosunod kon unsay patakaran nga gisitar sa nasyonal nga panggamhanan.
Klaro ang giya ug patakaran kung kinsa ang angayang makadaat sa SAP ug angayan kining sundon, matud ni Oaminal.
Ang SAP usa ka programa sa administrasyon ni Presidente Rodrigo Duterte nga gipatuman sa DSWD aron mahatagan ug ayuda ang mga kabos nga naapektuhan sa pandemya sa Coronavirus-19.- Expedita G. Roxas/Newsline.ph
