DAKBAYAN SA DABAW— PADAYON pa ang pagsaka sa ihap sa mga natapdan sa Corona Virus Disease kon COVID-19 dinhi sa Pilipinas kung diin subay sa pinakaulahing datus nga gipagawas sa Department of Health kon DOH hapit na kini miabot sa 477,000 ka kaso.
Base sa pinakaulahing bulletin nga gipagula sa DOH, midugang ang bag-ong kaso nga miabot ngadto sa 1,097 hinungdan nga mipatong na ngadto sa 476,961 ang kumpirmadong kaso sa Covid 19 sa nasud.
Sa maong ihap anaa sa 5.8% ang aktibong kaso kon anaa sa 27,721, samtang anaa sab sa 82.3% ang mga dunay mild ang sintomas, 4.9% ang kritikal ang kondisyon, 2,6% ang severe, 0.43% ang moderate, ug anaa sab sa 9.8% ang mga asymptomatic kon mga pasyente nga walay sintomas nga gihambin.
Migawas usab nga ang lalawigan sa Davao del Norte maoy nag-una karon sa mga probinsya sa tibook nasud nga dunay pinakadaghang kaso nga natala nga miabot ngadto sa 65 subay sa pinakaulahing datus nga gisundan sa Davao City nga dunay 60, Laguna 53, Batangas 48, ug ang Cavite 4.
Natala sab ang dugang ihap sa mga namatay nga miabot ngadto sa lima ug sa kinatibuk-an muabot na ngadto sa 9,253, samtang sa mga nakalingkawas, midugang ang bag-ong ihap nga anaa sa 47 hinungdan nga miabot na kini sa kinatibuk-ang ihap nga 439,942.
Samtang ang maong ihap posibleng madungagan pa kini tungod wala pa dinhi nalakip ang resulta gikan sa 15 ka mga Covid 19 laboratories sa nasud sanglit wala pa sila nakasumiter sa ilahang taho alang sa Enero Uno tungod temporary unavailable pa ang Document Repository System sa ahensya ug anaa sab sa 33 pa ka mga laboratory ang wala nag-operate karon tungod sa holiday season.-Marvin Pineda
