DAKBAYAN SA DAVAO-— Miduyog si Presidente Ferdinand Marcos Jr. sa ubang lideres sa kalibutan sa pagkondena niadtong Sabado sa pagpamusil-patay sa 133 ka mga tawo nga naghulat sa konsyerto sulod sa Crocus City Hall Concert, bandang alas 7:30 sa gabii (Oras sa Pilipinas) didto sa Krasnogorsk, Moscow, ang kapital sa Russia.
Matud sa mga taho, upat (4) ka mga nakasout og military uniform ang misulod sa lugar nagpataka og pamisul gamit ang de kalibreng automatic nga mga armas, samtang nangandama ang mga tawo nga motan-aw sa konsyerto sa Picnic, usa ka sikat nga rock band sa Moscow.
Nagsige usab og panglabay og bomba ang mga suspetsado.
Daling gi-angkon sa Islamic State (IS) ang responsibilidad sa sa pag-atake.
Sa report sa CNN International gitaho niini nga mokabat sa kapin usa ka gatos (100) ka mga tawo ang samaran sa nahitabong pagpangataki nga miresulta sa pagkasunog sa bilding.
Apan, ang mga opisyal sa Russia wala pa moila nga ang teroristang grupo nga maoy nagpaluyo sa pagpatay, uban sa pipila ka mga tigpaniid nga namatikdan nga ang IS wala pa magpakita og ebidensya sa pagpaluyo sa ilang pag-angkon.
Sa iyang mensahe, gipadayag ni PBBM ang iyang pasasubo sa pagkamatay sa mga inosenteng sibilyan.
“I am profoundly saddened by the innocent lives lost in the horrific ISIS attack at the concert hall in Moscow,” saysay ni Presidente Marcos Jr.
“My deepest condolences to the families affected by this senseless act of terrorism,” Dugang niini.
Dili pa lang dugay, onse (1) ka indibidual na ang gidakop ug anaa sa prisohan nga posibleng dunay kalambigitan sa pagpangataki.
Si Russian President Vladimir Putin sa iyang mensahe sa telebisyon nagkanayon nga ang pagpangataki usa “bloody, barbaric act of terrorism” ug gideklara niini ang adlawng Domingo isiip “A day of national mourning.”
Sumala ni Putin gihimo sa mga medical workers ang tanan aron maluwas ang kapin gatos ka mga indibidual nga anaa pa karon sa mga hospital.
Misaad si Putin nga manubag ang mga naghimo sa madugong pagpangataki.
Pangitaon usab sa Russia ang mga tawo nga nagpaluyo sa insidente.
