DAKBAYAN SA DAVAO –— Unom ka mga tawo ang namatay ug daghang uban ang naangol – lakip ang usa ka siyam ka bulan nga bata – sa dihang ang usa lalaki ang nagpataka og panunggab gamit ang kutsilyo sa sulod sa usa ka shopping center sa Sydney, Australia kaniadtong Sabado.
Sumala sa kapulisan sa Australia, kalit kaayo ang panghitabo ug daghan ang nadunggaban.
Apan, daling gipusil sa usa ka babayeng pulis ang suspek nga gikamatay niini.
Ang insidente nahitabo sa lapad nga Westfield Bondi Junction mall complex, nga napuno og shoppers niadtong Sabado sa hapon.
Sa interbyu kang Karen Webb, ang tigpamaba sa ambulansya sa New South Wales, gisaysay niini nga lima ka babaye ug usa ka lalaki ang namatay. Usa ka bata ang gipailalom sa emergency surgery.
Matod sa kapulisan nga ang nag-atake gituohan nga usa ka 40-anyos nga lalaki ug nailhan na apan, wala usa ginganlan sa kapulisan.
Ang mga nasamdan nagbuy-od nga wala nay kinabuhi sa salog, o gilibutan sa mga linaw sa dugo.
Gihulagway sa mga nakasaksi ang usa ka talan-awon sa kalisang, uban sa mga mamalitay nga nagdali-dali aron luwas ug ang mga pulis naningkamot sa pagsiguro sa lugar.
Daghang mga tawo ang mipasilong sa mga tindahan, naningkamot sa pagpanalipod sa ilang kaugalingon, sa ilang mga pamilya ug nahadlok nga mga estranghero.
