DAKBAYAN SA DAVAO— Ipahigayon sugod karong adlawa ang pinakadakung Balikatan joint military exercise tali sa Pilipinas ug Estados Unidos, nga salmutan sa 16,700 ka tropa.
Ang ika-39 nga Balikatan, giingong pinakadaku sa sulod sa upat ka dekada, ipahigayon kini gikan Abril 22 hangtod Mayo 10 sa Palawan ug Batanes, duol sa Taiwan ug South China Sea, nga parehong mga lugar nga giangkon ug gimonitor sa China.
“Ang mga available nga assets sa Philippine Army gamiton para makita nato ang interoperability niini sa tanang major service,” matod ni Philippine Army spokesperson Col. Louie Dema-ala sa interbyu sa GMA Super Radyo DZBB nga gisibya sa 24 Oras Weekend biadtong Domingo.
“Tinitignan nato kung in line ba kini sa mga kasamtangang SOP (standard operating procedures), ‘yung TTPs natin, ‘yung tactics, techniques, and procedures ‘pag dating sa combat operations,” dugang niya.
Ang Balikatan karong tuiga gikatakda nga maglambigit sa mga pagbansay-bansay sa command and control, ug field training, ingon man sa humanitarian civic assistance. Ang mga partido mopahigayon usab og multilateral maritime exercise o joint sailing exercise sa exclusive economic zone (EEZ) sa Pilipinas.
Apil usab niini ang mga personahe sa Australian Defense Force ug Marine Nationale (French Navy), uban sa partisipasyon sa mga ahensya sa gobyerno sama sa Philippine Coast Guard (PCG), Philippine National Police (PNP), Department of Information, Communications , ug Technology (DICT), ang Office of Civil Defense (OCD), ug ang Presidential Communications Office (PCO).
