DAKBAYAN SA DAVAO-— Usa ka konsehal sa munisipyo ug lima ka kauban niini ang samaran sa ambush nga natihato Sabado sa buntag didto sa Sitio Lessem, Barangay Bato-Bato sa munisipyo sa Akbar didto sa probinsya sa Basilan.
Giila sa kapulisan ang mga samaran nga sila si Husin Latip Kalang, konsehal sa munisipyo sa Tuburan; Ryan Seyong Latip, Abubakar Atih Latip, Jemar Kalang, Ajim Jamaluddin, ug Algafar Naser, pulos residente sa Tuburan.
Sa inisyal nga imbistigasyon sa kapulisan, nahibaw-an nga gikan ang mga biktima sa Tuburan ug padulong sa Sitio Lessem, Barangay Upper Bato-Bato,sa dihang gipamusil sila sa mga armadong suspeks nga nagdala og mga de libreng armas.
Nakigpinusilay ang grupo ni konsehal Kalang sa mga namanhig kanila hinungdan nga daling nanibat ang mga suspeks.
Sa report nga nakaabot kang Bangsamoro Regional Police Director Brig. Si Gen. Si Prexy Tanggawohn, giila ang mga suspeks sa panguna nilang Jemar ug Kidyok, nga dunay kasuko sa pikas grupo tungod kay giingong gidagit nila ang usa sa ilang kabanay nga si Jimmy Nani nga hangtod karon wala pa nakita.
Sumala sa mga opisyales sa police ug Army intelligence units sa Basilan, ang duha ka grupo nagdumot ug nalambigit sa usa ka “rido,” o clan war, nga may kalabotan sa pagdagit sa nawala pa nga ni Jimmy Nani, paryente ni Jemar ug Kidyok.
Ang mga sumusunod ni Jemar ug Kidyok maoy gisuspetsahan nga mipatay niadtong milabayng semana kang Nurjan Latip, kanhi kapitan sa Caddayan sa Akbar,
Naghimo na og lakang su Basilan Governor Hadjiman Salliman, mga opisyal sa Basilan Provincial Police Office ug 101st Infantry Brigade sa Army aron bulagon ang duha ka grupo, aron dili na masubli ang duguong insidente nga nakalisang sa mga residente sa Sitio Lessem.
Daling gidala ang mga samaran sa Lamitan District Hospital sa Basilan samtang ang uban gibalhin sa Zamboanga City aron matambalan ang mga samad sa bala.-ezc
