DAVAO CITY — Ang Armadong Kusug sa Pilipinas (AFP) nakapuntos og dako batok sa mga rebeldeng komunista human nga natapos ang “unilateral ceasefire” nga gideklarar ni Pangulong Rodrigo Duterte tungod sa pag-ulbo sa coronavirus disease (Covid-19) sa nasud.
Sukad natapos ang ceasefire niadtong Abril 16, ang AFP nakahimo og 34 ka mga combat operation nga miresulta sa pagkamatay sa 10 ug pagkasikop sa pito ka miyembro sa New People’s Army (NPA).
“The operations accounted for 10 terrorists dead and seven captured or surrendered in various skirmishes in Luzon, Visayas, and Mindanao,” matud pa ni AFP spokesperson Marine Brig. Gen, Edgard Arevalo sa usa ka pamahayag nga giluwatan karong Biyernes, Mayo 1.
Nakuha usab gikan sa mga operasyon ang 58 ka mga tag-as og kalibre nga armas, sama sa mga grenade launcher, M-16, AK-47, ug M-14.
Aduna usab narekober nga mga magazine, klase-klaseng mga bala, 20 ka “improvised explosive device,” ug mga subersibong dokumento.
Si Arevalo nag-ingon nga ang AFP wala mahulga sa NPA, apan sila nabalaka sa mga pagpang-atake nga gihimo sa mga rebelde ngadto sa mga sibilyan.
“What we are more concerned with and is determined to prevent are their attacks on non-combatant civilians and tribal leaders which are also violations of International Humanitarian Law,” si Arevalo nagsulti.
Daghan na usab ang mga nireklamo sa mga pagpang-abuso sa NPA, sama sa pagpangawat sa mga relief goods sa katawhan ug pagpamatay sa mga lider sa komunidad karong panahon sa krisis matud ni Arevalo.
Tungod niini, si Arevalo nag-ingon nga ang mga lumolupyo dili na magpanuko sa pagsumbong sa presensiya sa mga rebelde sa ilang komunidad, ug kini miresulta sa kalampusan sa mga operasyon sa AFP.
Dugang pa ni Arevalo nga ang militar kanunay’ng andam nga makigbatok sa bisan unsang kaaway.
“We will not hesitate to put our lives on the line — against the unseen enemy which is Covid-19 or the lingering CPP-NPA virus. We will defeat them as one,” sulti ni Arevalo. (LBG)
