DAVAO CITY — Padayon ang pagsuporta sa gobyerno sa mga national athlete, apan subo nga mahibaloan nga kini maminosan tungod sa epekto sa coronavirus disease (Covid-19) sa nasud.
Sugod karon, ang mga binulang allowance sa mga national athlete ug coach minosan na og 50 porsiyento sa Philippine Sports Commission (PSC), sigun ni PSC chairman William Ramirez.
“With much regret and after several discussions within the Board and senior officers of the agency, a 50% reduction on allowances of athletes and coaches shall be effected starting June 1,” pahibalo ni Ramirez sa usa ka pamahayag nga giluwatan sa PSC.
Pasabot ni Ramirez nga naapektahan kaayo ang National Sports Development Fund (NSDF) tungod sa dakong gasto sa gobyerno sa milabay nga kapin duha ka bulan samtang gipatuman ang Enhanced Community Quarantine (ECQ) para batukan ang Covid-19.
Ang pondo nga gigahin para sa mga allowance sa mga national athlete ug coach naggikan tanan sa NSDF.
Tungod niini, nadesisyonan sa PSC Board nga minosan na lang gyud ang allowance sa mga atleta ug coaches aron aduna pa sila’y madawat hangtud Disyembre karong tuiga.
Matud pa ni Ramirez, sakit sa ilang buot ang paghimo sa maong desisyon, apan kini ang angayan buhaton para molungtad ang ilang pagsuporta sa mga atleta.
“This is a hard decision to make, but one that needed to be done so we can continue caring for our athletes longer,” saysay ni Ramirez.
Hinuon, gipasalig ni Ramirez nga kini temporaryo lamang ug ibalik sa saktong kantidad ang mga allowance sa panahon nga makabawi na ang NSDF sa ilang pondo. (LBG)
