DAKBAYAN SA TANGUB — NASIKOP sa hiniusang puwersa sa Philippine Drugs Enforcement Agency (PDEA) ug Tangub City PNP ang usa ka pulis nga naghupot ug ‘shabu’ sa sulod sa iyang kuarto niadtong Domingo alas 9:00 sa gabii sa Barangay Labuyo niining dakbayan.
Giila ni PDEA Region 10 Agent Benjamin Recytez nga ang suspek mao si Police Staff Sergeant Manuel Angcap nga nadistino sa Aloran Municipal Police Station sa lalawigan sa Misamis Occidental.
Gidugang sa PDEA nga pinaagi sa gahom sa search warrant nga gipagawas ni Judge Sylvia Machacon, presiding judge sa Regional Trial Court (RTC) Branch 16, Tangub City ilang gisulod ang panimalay sa maong polis.
Nakuha gikan sa kuwarto sa polis ang 25 gramos nga gituohang shabu nga adunay street value nga P165, 000.00. Lakip sa nabawi sa PNP ug PDEA ang mga shabu paraphernalia ug ang service fire arm sa maong polis.
Saysay ni Recytez nga si Angcap naapil sa ‘drug personality target list’ ug taod-taod na usab nila nga gipanid-an.
Gani gikakurat ni Barangay Kapitan Jonathan Labares ang maong hitabo nga naapil sa target list sa PDEA ang maong polis.
Mag-atubang ug kasong pagsupak sa RA 9165 ang nasikop nga polis. –Neptalie Batolenio
