DIPOLOG CITY – Sa ikaduhang g higayon, nadakpan na usab sa kapulisan sa Dipolog ang kanhi drug suspect nga si Rolando Alegrado, 38 anyos, anak ni kanhi barangay Barra konsehal Trinidad Alegrado.
Gidakop si Rolando tungod sa padayon niining paghupot og illegal nga druga.
Nadakpan kini atol kini sa gilusad nga anti-illegal drug buy-bust operation, alas 8:35 sa gabie, Nobiembre 27, sa Mabini Street, Barangay Barra, sa pagpanguna ni Police Lt.Col. Gilzen Nino Manese, hepe sa Dipolog PNP.
Gilusad ang operasyon basi sa search warrant nga gipakanaug ni Judge Victoriano Lacaya sa Regional trial Court, niadtong Nobiembre 25.
Kauban pud sa kapulisan aron pag-saksi sa raid ang representante sa Department of Justice ug sa Media, ingon man si Punong Barangay Moman Apura ug lakip sa gipatan-aw ang asawa mismo sa suspek, dihang gipangita na ang posibleng gibutangan og illegal nga droga.
Sumala sa kapulisan, ang illegal nga druga napalgan nila sa ground floor particular sa tindahan diin ang druga gisulod sa driver’s license cover nga gipatongan og bonnet ug faceshield sa ibabaw sa refrigerator sulod sa tindahan.
Partikular sa nakompiska ang lima ka mga gagmayng sachets sa gituohang shabu nga gibana-bana-ang mobalor sa Php 84,000.00.
Perting limod sa suspek ug sa iyang asawa kay kuno dili ilaha ang gamayng pitaka nga butanganan ug driver’s license diin gilokluk ang shabu ingon man sa bonnet nga maoy gitabon sa shabu.
Apan, sa pag-imbistiga kanila, mipirma kini sa inventory sheets nga naglatid sa mga epektos ug shabu nga nakoit-an atol sa pagpangronda.
Una nang nadakpan sa kapulisan si Alegrado niadtong tuig 2018, tungod sa pagkalambigit sa iligal nga drug, apan human sa duha ka bulan nakagawas kini sanglit nagpailawon sa plea bargaining agreement sa DOJ.
Sagad sa mga akusado sa druga mogamit sa pleae bargaining agreement aron makagawas.
Ang plea bargaining agreement sagad gamiton sa mga kasong kriminal, unod sa maong dokumento ang kasabutan tali sa akusado ug sa prosecutor kung diin kinahanglan matubag ug masunod sa akusado ang tanang kondisyon nga gilatid sa prosecutor, apan kini, ginahanglan aprobahan sa korte.
Gikinahanglan usab nga ang Plea Bargaining Agreement makabenepisyo sa katawhan, Sagad niini mosaad ang akusado nga iyang nganlan ang mga kauban niya nga anaa sa ilegal nga druga o di ba kaha iyang isaad nga mamahimo siyang modelo sa kaayuhan sa katawhan sa pagpalambo sa iyang komunidad.-Zorayda Eva Matsuril
