SYUDAD SA OZAMIZ –GISIKOP sa mga sakop sa kapulisan niining dakbayan ang usa ka Returning Overseas Filipino (ROF) ug ang asawa niini human nga makalapas sa quarantine protocols samtang anaa sa quarantine facility, Domingo sa hapon Hunyo 5, 2020.
Ang nasikop giila sa Ozamiz City PNP nga ang magti-ayon nga si Kenneth , 29 ug ang asawa niini nga si Elizabeth, 27 nga nagpuyo sa Barangay Baybay Sta. Cruz Ozamiz City.
Nasayran nga ang ROF naka-quarantine sa Executive Hotel, nga maoy gijimo nga quarantine facility sa LGU-Ozamiz apan ang ‘gimingaw’ nga asawa wala na makapugong misulod sa kuwarto sa iyang bana.
Gikatakdang kasuhan ang mag-tiayon og paglapas sa R.A. 11332 o Mandatory Reporting of Notifiable Diseases and Health Events of Public Health Concern Act.
Sumala sa tag-iya sa hotel una niini nagtinguha nga moeskapo ang maong bana sa hotel apan ila kini nga namatikdan. Apan kahapon sa sa buntag , (Huyo 5, 2020) mi-check in ang asawa sa hotel ug didto misulod sa kuwarto sa iyang bana.
Sa iyang kabahin, gipadayag ni Ozamiz City mayor Fernando Sancho “Ando’ Oaminal nga ang gihimo sa magtiayon maoy paglapas sa quarantine protocols ug health and safety standards.
Wala usab mopagawas ug pamahayag ang magtiayon nga nasikop.
Ang Ozamiz City ilalom gihapon sa Modified General Community Quarantine (MGCQ).-Neptalie A. Batolenio
