DAKBAYAN SA DABAW — Gimando ni North Cotabato Governor Nancy A. Catamco nga pakusgan sa provincial veterinarian’s office ang ilang kampanya batok sa African Swine Fever (ASF) nga nakaapekto na sa pipila ka munisipyo.
Matud ni Catamco kinahanglan nga matag purok, barangay ug komunidad, mahibalo sa seryosong problema nga gidala sa ASF sa ekonomiya sa probinsya kung mokaylap ang kagaw nga mipatay sa pipila ka mga baboy nga gipadaku lang sa mga yanong residente kon backyard raisers
Kapin 2,000 ka baboy na ang natakbuyan sa ASF sa nahisgutang probinsya.
Gihangyo ni Catamco ang kooperasyon sa katawhan, mga opisyales sa Barangay ug ang mga tag-iya sa baboyan nga motabang sa pagpugong sa ASF.
Ang industriya sa Baboyan sa North Cotabato, gibana-bana nga mokantidad na sa P1.1-bilyon ug daku kini ug epekto sa ekonomiya sa probinsya kung dili dayon masolbad ang problema sa ASF.
Sa iyang kamanduan, gipabantayan ni Catamco nga dili gayud makagawas ug sulod ang mga baboy sa mga komunidad nga giilang mga high rish sa ASF.
Bisan ang pagkaon ug pagdala sa karne ug mga produkto sa baboy sama sa tsoriso, hotdog, tocino ug uban pa, sa mga lugat nga dunay kaso sa ASF.
Gilusad usab ang sunod-sunod nga tigum kauban ang mga nanag-iya ug baboy ug mga tag-iya ug dagkong baboyan sa probinsya ug didto gipasabot sa Gobernador ang importansya sa kooperasyon sa matag usa sa pag atubang sa problema sa ASF.
Atol sa mga miting nga gilusad didto sa mga munisipyo sa Arakan, Magpet, Pres. Roxas, Makilala ug Kidapawan City komprehensibong gipakta ang hiniusang kampanya sa probinsya aron malikayan ang pagkaylap sa ASF.
Ang mga pulong-pulong gipangunahan ni Catamco kuyog ang Provincial Administrator’s Office, Provincial Veterinarian’s Office ug mga lokal nga opisyal.
Apil usab sa miting mao ang paghangyo alang sa tabang gikan sa Barangay Peace Action Team (BPAT), BHW ug uban pang mga kawani sa barangay aron mapugngan ang pagsulod sa mga produkto sa karne sa usa ka lugar. “Kini usab ang labing hinungdanon nga sector nga makasagop sa kinahanglanon sa lockdown,” matud ni Dr. RUfino Sorupia, ang probinsyal nga veterinarian.
Gusto usab sa OPVET nga palig-onon ug ipasabot sa tanan nga mga apektado, ang tabang pinansyal nga makadawat P5,000 gikan sa Department of Agriculture, P2,000 gikan sa LGU ug P2,000 gikan sa Provincial Government. Makadawat usab og P9,000 ang mga tag-iya sa baboy. Giklaro usab niini nga adunay kwalipikasyon sa pag-ihap.
