OZAMIZ CITY--MITALA kagahapon ang lalawigan sa Misamis Occidental og bag-ong 25 ka kaso sa Coronavirus disease (COVID-19.
Gipadayag ni Misamis Occidental governor Philip Tan nga dili gayud angay nga mokompiyansa ang matag-usa tungod kay ang COVID-19 anaa lang sa palibot ug gikinahanglan nga sundon kanunay ang health protocols, social distancing, pagsuot ug face mask ug face shield u gang kanunay nga pagpanghinaw sa kamot.
Sa maong bag-ong kaso sa COVID-19 sa lalawigan, anaa sa 96 karon ang aktibong kaso, moabot na sa 614 ang kinatibuk-ang kaso sa COVID-19, 505 ang naulian, ug adunay 13 ang namatay.
Sa 25 ka bag-ong kaso, 11 niini naggikan sa lungsod sa Bonifacio, 4 sa lungsod sa Clarin, tag-duha gikan sa Ozamiz City, Tangub City ug lungsod sa Sinacaban. Adunay tag-usa usab ka bag-ong kaso sa COVID-19 ang lungsod sa Plaridel, Calamba, Baliangao ug Tudela.
Ang Misamis Occidental adunay 14 ka lungsod ug 3 ka siyudad.
Sa 14 ka lungsod sa Misamis Occidental 7 niini ang adunay bag-ong kaso sa COVID-19 samtang sa tulo ka siyudad duha niini ang adunay bag-ong nagpositibo.
Ang Misamis Occidental ang anaa pa gihapon sa Modified General Community Quarantine (MGCQ.[NEPTALIE A. BATOLENIO]
