ANG Philippine Sports Commission (PSC) mopagawas puhon og bag-ong listahan sa mga paugnat sa kusog nga tugotan ubos sa kwarentina.
Kini ang gibutyag ni PSC commissioner Ramon Fernandez sa usa ka interbyu sa radyo kagahapon sa Martes, Mayo 26, human sa ilang board meeting.
Matud pa ni Fernandez, ilang gituki sa maong meeting ang mga rekomendasyon sa mga national sports association (NSA), apan ila pa kining pagatun-an.
“There are no additional recommendations at the moment. The chairman and the PSC board are looking into this,” sulti ni Fernandez.
Gitahasan sa gobyerno ang PSC nga motabang sa pag-desisyon kung unsa nga mga sports ang mahimo nang madula inig abot sa panahon nga ipaubos na ang tibuok nasud sa general community quarantine.
Sumala ni Fernandez, open-water swimming pa ang dunay pagtugot sa pagka-karon, apan nagpaabot nang aprubahan sa Inter-Agency Task Force for Infectious Diseases (IATF) ang badminton, equestrian, golf, skateboarding, ug tennis.
Daghan na sa mga NSA ang naka-sumiter sa ilang mga proposal ug ang PSC naghulat na lang sa mga rekomendasyon sa uban.
Ang mga NSA nga nakahatag na sa ilang mga position paper naglakip sa athletics, karatedo, muay thai, rowing, rugby, triathlon, ug ang Philippine Sports Association for the Differently Abled. (LBG)
