DAVAO CITY — Gihangop ni Interior Secretary Eduardo Año ang rekomendasyon sa Metro Manila Council (MMC) nga ibutang na ubos sa general community quarantine (GCQ) ang metropolidad karong Hunyo.
Si Año, hinuon, miingon nga si Presidente Rodrigo Duterte lamang ang makahatag og pinal nga desisyon sa maong matang.
“Maganda naman yung ginawa nila na yan pero siyempre ang masusunod pa rin or magbibigay ng desisyon diyan ay ang Pangulo base sa recommendation ng IATF (Inter-Agency Task Force for the Management of Emerging Infectious Diseases),” sulti ni Año sa usa ka pakighinabi sa radyo sa Miyerkules, Mayo 27.
Matud pa niya, ang Presidente gilaumang makahatag sa iyang desisyon karong Huwebes o Biyernes.
Niadtong Lunes, si Año nag-ingon nga ang gobyerno nagplanong mo-implementar og “barangay-based lockdown” human matapos ang modified enhanced community quarantine sa Metro Manila karong Domingo, Mayo 31.
Ang mga barangay nga adunay taas nga insidente sa coronavirus disease (Covid-19) mahimong ipaubos sa lockdown, samtang ang ubang lugar naa sa GCQ.
Mahimo usab nga mopatuman ang mga lokal nga kagamhanan og mga ginagmay nga lockdown, sama sa mga subdivision ug mga sitio.
Aduna gihapo’y mga random nga checkpoint ubos sa GCQ sanglit daghan nang mga tawo ang mobalik sa ilang mga trabaho ug daghan nang mga negosyo ang moabli pagbalik. (LBG)
