DAKBAYAN SA DAVAO — Gustong himoun ni Presidente Ferdinand Marcos Jr. ang probinsya sa Basilan isip sentro sa pagkaon og pangisda sa Pilipinas.
Ang nahimutangan sa Basilan ug kalidad sa yuta niini naghimo niini nga usa ka sulundon nga sentro sa pagkaon nga makatabang sa mga problema sa seguridad sa pagkaon sa nasud, matud sa Presidente.
Sa iyang pakigpulong sa mga opisyal atol sa iyang pagbisita sa Basilan niadtong Sabado, gisaysay sa Presidente nga gilantaw sa iyang administrasyon nga himoung sentro sa kabag-ohan ug sentro sa giera batok sa kagutom ang nahisgutang probinsya.
Ang probinsya sa Basilan, matud sa Presidente, Adunay yuta nga doble sa gidak-on sa Singapore, gipanalanginan sa tabunok nga yuta, labaw sa tanan dili kaayo kini maigo sa bagyo, ug mamahimong maayong sentro sa pagkaon ug pangisda,
Kung maabrihan ang agri-fisheries potensyal sa Basilan, ang tibouk nasud ang makabenepisyo. Kini maghimo sa Basilan nga dili na usa ka isla nga layo sa habagatan, apan, usa ka estratehikong isla sa atubangan ug sentro sa atong nasudnong mga tumong ug sa atong pagbag-o, pasabot ni Marcos.
Ang nasudnong kagamhanan, matud ni Marcos, naghatag og kasiguraduhan sa pagtabang sa Basilan sa pagtuman sa bag-ong tahas niini batok sa “gubat batok sa kagutom,.”
Ang kailangan lang tabangan ang Basilan para mahimong usa ka hingpit nga food and fisheries production center, matod sa Presidente.
“Please be assured that we will play our role as partner of Basilan’s great leap forward,” dugang niya.
Nailhan kaniadto ang Basilan nga usa sa mga kuta sa teroristang grupong Abu Sayyaf nga nakaganansya gikan sa kidnap-for-ransom schemes ug gipunggotan og ulo ang pipila ka langyaw ug lokal nga mga hostage niadtong dekada 90 ug sayong bahin sa 2000.
Gilusad sa gobyerno ang Small Arms and Light Weapons (SALW) ug Assistance for Security, Peace, Integration and Recovery for Advanced Human Security sa BARMM (ASPIRE) aron mahibalik ang kalinaw sa rehiyon.
Ang padayon nga pag-uswag sa Basilan mao ang yawe sa paghimo niini nga “usa ka sentro sa kalinaw,” matod ni Marcos.
“Ang kalinaw labaw pa sa paghunong sa panag-away. Mahitungod kini sa paghimo sa usa ka sosyal nga kahusay nga nagpabili sa dignidad sa tawo, nagpauswag sa kinabuhi, ug nagpasiugda sa pag-uswag, ”ingon niya.
“Ang kalinaw hingpit nga makab-ot dili kung ang tingog sa buto sa armas natapos na. Kini mao ang panahon nga ang pagsinggit alang sa mas maayo nga mga kinabuhi nahimamat, ”ingon niya.
Gidayeg ni Marcos ang katawhan sa Basilan tungod sa ilang “mapasigarbuhon nga kasaysayan tungod kay nagdumili kini nga magpadayon nga usa ka lugar sa kapintasan.”
“Giatake ug gihulga, ang mga tawo sa Basilan apan, mibarog sa ilang baroganan,” dugang sa Presidente.
“Wala gyud nila itugyan ang ilang mga komunidad, wala gyud itugyan ang ilang kaugmaon sa usa ka ideolohiya nga nakig-away sa mga mithi nga ilang gimahal,” ingon niya.
“Kini ang matang sa kalinaw nga atong nasaksihan sa Basilan, sa lain-laing mga tinuohan nga nagtinabangay, tungod kay gipili sa mga tawo nga dili tugutan ang pagkalainlain nga mahimong hinungdan sa pagkabahinbahin, apan gigamit kini ingon usa ka gigikanan sa kusog ug panaghiusa,” dugang niya.
Sa iyang pagbisita sa Basilan gisaksihan sa Presidente ang pagkaguba sa mga 400 ka mga armas ug pag-apod-apod og daghang mga motorsiklo ngadto sa mga kanhi rebelde ug tag-iya og armas.
