Negosyanteng babaye gipusil-patay sa Davao

DAVAO CITY (Hunyo 29) – Patay ang babayeng negosyante og scrap metal human gipusil sa armadong backride sa motorsiklo sa Daang Maharlika Highway Km. 16, Holcim Ilang, Davao City kagahapon sa kaadlawon, Hunyo 28, 2025.

Base sa report sa kapulisan, gikan nag-deliver og scrap metal ang biktima nga giila sa mga pulis nga si alyas “Mary Joy”, 33 anyos, kauban ang live-in partner nga driver sa elf nga giilang si alyas “Dino” nga residente sa Mañalac, Panabo City, Davao Del Norte ug pag-abot nila sa nahitaboan sa krimen pasado alas 3:00 sa kaadlawon, gipara sila sa duha ka lalaking naka motorsiklo.

Kay adunay traffic violations sila alyas “Dino” ug mikanaug kini sa sakyanan ug nagpabilin sa sakyanan si alyas “Mary Joy” apan ang backride sa motor maoy miduol sa biktima ug adunay komprontasyon nga nahitabo ug nadunggan na lang ni dino ang usa ka buto sa pusil.

Nakita na lang ni dino nga gitangag sa armado ang bag sa iyang live-in partner nga adunay sulod nga 200,000 pesos ug mga alahas.

Misibat ang mga armado human sa krimen padulong sa sentrong bahin sa Davao City ang direksiyon ug pag-abot sa miresponding miyembro sa emergency medical technician sa 911 nasuta niini nga wala nay kinabuhi si alyas Mary joy nga naka-angkon og usa ka samad pinusilan sa ubos sa iyang ribs.

Narekober sa SOCO ang basyo sa bala sa .45 pistol ug 4 ka alahas sa biktima.

Usa sa nakitang motibo sa mga pulis ang kasong robbery with homicide apan palawoman pa sa mga pulis ang imbestigasyon aron matugkad ang tinuod nga motibo sa krimen hilabi na nga taga Panabo City ang biktima.