DAKBAYAN SA DABAW (Septembre 19) — Nasikop sa mga operatiba sa National Bureau on Investigation (NBI) ug kapulisan ang manager ug news director sa istasyon sa Bombo Radyo General Santos City, sa aktong pagdawat sa ilang kinilkil nga salapi gikan sa usa ka pastor, alas tres sa hapon kagahapon, September 18, sulod sa Robinsons Mall sa GenSan.
Gidakop sa usa ka entrapment operation ang manager sa Bombo Radyo GenSan nga giilang si Jonathan “Janjan” Macailing ug ang iyang news director nga si Salvador Galano.
Sumala pa, gisigihan kuno ug ataki sa kahanginan si Pastor Joel Apolinario, ang nagdulala sa KAPA-Community Ministry International nc., ug didto nagsugod ang ilang negosasyon.
Si Apolinario, usa ka pastor nga nag-negosyo pinaagi sa KAPA , gi-isyu nga nalambigit sa bugos nga asosasyon,
Matud pa ni Atty. Rener Peneza, hepe sa NBI Saranggani District Office, sa pakighinabi sa ABS-CBN GenSan, nga una nang nakadawat ang duha ug P400,000 nga suborno niadtong milabayng bulan. Gani, mihunong kadyot ang ilang pag-pangataki sa Pastor.
Apan, nitawag na usab daw si Macailing ug nangayo ug P10-milyones aron dili na sya atakihon.
Nagkasinabot sila nga mohatag lang ug pasi-unang P5-milyones si Apolinario, aron maundang na ang isyu batok kaniya.
Apan, ang wala masayri ni Macailing ug Galano, nagkontak na si Apolinario sa NBI aron himon ang entrapment batok kanila.
Kagahapon, gihimo ang entrapment operation ug didto nasikop ang duha.
Apan, mirason si Macailing nga dili tinoud ug tumotumo lang ang isyu batok kanila. Gani siya nagbutyag nga mogawas ra daw gihapon ang kamatuoran.
“Siya man (Apolinario), nag nagsige ug galgal ug suborno, pero akong gi-ingnan nga i-agi natu ug kontrata maong nakig-meeting mi,”Midugang si Macailing .
Gisigihan ug ataki sa kahanginan si Apolinario tungod kuno sa “Scam” o peke ang iyang organisasyon nga KAPA (Kabus Padatuon).-Harold V. Pontongan/NewsLine.ph