DAVAO CITY — Ang tradisyonal nga “moonsighting” para pagtimaan sa pagsugod sa bulan sa Ramadan pagahimuon karong Abril 22, Miyerkules, sa tibuok Bangsamoro Autonomous Region in Muslim Mindanao (BARMM).
Kini ang gipahibalo sa Bangsamoro Darul-Iftah niadtong Huwebes, Abril 16.
Matud pa ni Abuhuraira Udasan, ang Bangsamoro Grand Mufti, nga kung makit-an ang “crescent moon” karong umaabot Miyerkules, ang Ramadan magsugod dayon sa Abril 23.
Apan kun ugaling dili magpakita ang “crescent moon” karong Miyerkules, ang balaang bulan sa Ramadan pagasugdan sa Mayo 2 na, dugang ni Udasan.
“Mohimo kami og official announcement (mahitungod niini) sa Abril 22, alas 8:00 sa gabii pinaagi sa among official Facebook page ug sa among mga media partner,” pulong pa ni Udasan.
Nagpahibalo usab ang Darul-Iftah nga suspendido ang mga “Taraweeh” (special evening prayers) ug ang lima ka beses nga mga pag-ampo kada adlaw sa tanang mosque sa BARMM tungod sa hulga nga dalit sa coronavirus disease (Covid-19).
“Kini pagsunod sa ‘fatwa’ sama sa pagtuman sa social distancing. Sa congregational prayers, ang mga deboto manindog og dug-ol kaayo. Kinahanglan gyud ang social distancing aron walay matakdan sa virus,” ingon ni Udasan.
Ang “fatwa” (religious guideline) naghisgot sa “hadith” (Islamic teaching) nga nag-ingon “Don’t cause harm or return harm,” pagpasabot ni Udasan.
Hinuon, mahimo rang buhaton ang “Taraweeh” sa sulod sa panimalay.
Sa pagsaulog sa Ramadan, ang mga magtotoo sa Islam magpuasa kada adlaw sugod sa kaadlawon hangtud pagsalop sa adlaw sulod sa usa ka bulan.
Dili usab mahimo ang mga Muslim nga manigarilyo ug makighilawas sulod sa bulan sa Ramadan. (LBG)