DAKBAYAN SA DAVAO— Gilusad sa Department of Social Welfare and Development sa Davao Region (DSWD-11) ang Programa SOLO (Strengthening Opportunities for Lone Parents) sa probinsiya sa Davao del Norte, diin gihimong pilot area sa Mindanao ang Panabo City niadtong Huebes.
Sa usa ka pahayag nga gipagawas sa DSWD XI kaniadtong Biyernes, gisaysay sa ahensya nga ang programa gilusad pinaagi sa usa ka ceremonial signing sa Memorandum of Agreement tali sa kagamhanan sa dakbayan sa Panabo ug sa ahensya.
Nag una sa implementasyon dinhi sa Mindanao, ang barangay New Visayas sa Panabo City kay una kining midawat aron sa pagplastar sa programa kung diin 30 ka mga benepisyaryo ang gipili base sa Listahanan 3 database.
Aron maseguro nga hapsay ang pagpatuman sa programa, ang mga kaagapay nga ahensya , lakip ang DSWD-11 ug ang kagamhanan sa Panabo, miagi sa komprehensibong pagbansay-bansay sa dakbayan sa Cebu niadtong Marso 18 ngadto sa 23, uban sa ubang pilot implementers gikan sa Luzon ug Visayas.
“Kini nga hugna sa pagpangandam nagtumong sa pagsangkap sa mga nagpatuman sa gikinahanglan nga kahanas ug kahibalo alang sa malampuson nga pagpatuman sa Programa SOLO,” dugang sa DSWD-11.
Base sa Listahan 3 sa DSWD, nga giandam sa National Household Targeting Office (NHTO), dunay 583,787 ka mga indibidwal isip solo nga mga ginikanan.
Sa ihap, 422,486 ang mga babaye, ug 161,301 ang mga lalaki. Ang tumong sa programa mao ang paghatag gahum sa mga panimalay nga nag-inusarang ginikanan, nga makapahimo kanila sa paggiya sa lig-on ug komportable nga mga kinabuhi subay sa agenda sa nasudnong kalamboan.