China mas nangisog na batok sa Pilipinas

DAKBAYAN SA DAVAO— Mas agresibo na ang coast guard sa China ngadto sa mga barko sa Pilipinas sa didto sa South China Sea ug sa pag-atake niini og tubig mahimong mamilegro na ang kinabuhi sa mga tripulante, kini matud sa tigpamaba sa gobyerno sa Manila niadtong Miyerkules, Mayo 1.

Ang sunod-sunod nga mga insidente sa kadagatan nga naglambigit sa nasud sa Pilipinas ug China miresulta sa pagkaangol sa mga tropa sa Pilipinas niining pipila na ka bulan samtang nagbangi tungod sa teritoryao nga giangkon sa duha ka nasud.

Ang pinakaulahing insidente nahitabo niadtong Martes, naguba ang barko sa Pilipinas ug laing barko usab ang naguba sa dihang giisprihan na usab sa China Coast Guard og tubig ang barko nga paingon maghatud og pagkaon didto sa Scarborough Shoal.

Ang presyur sa tubig mas kusog kumpara sa nangaging mga insidente, ug nangagisi o gibawog ang mga bakal ug nadaut ang kagamitan sa mga barko sa Pilipinas, matod sa coast guard nga si Commodore Jay Tarriela, ang tigpamaba sa Manila sa South China Sea.

“Dayag nga makamatay kaayo kana,” matud ni Tariela, kay kusog na ang presyur sa tubig nga 14 ka kilo matag square centimeter ang kakusgon.

Hinuon matud ni Tariela, walay naangol ning higayona sanglit ang mga tripulante gimanduan nga mopasilong sa sulod. “Gipataas na karon sa Chinese coast guard ang tensyon ug ang lebel sa ilang agresyon batook sa Philippine Coast Guard,” matud ni Tarriela.

Giangkon sa China ang halos tibuok South China Sea, gisalikway ang desisyon sa International Tribunal nga medisyon nga dili sa China ang nahisgutang terirtoryo apan gibalewala kini sa China ug giangkon ang lugar.

Ang Scarborough Shoal nahimong usa ka init nga lugar tali sa mga nasud sukad nga giilog kini sa China gikan sa Pilipinas ang lugar sukad niadtong tuig 2012.

Ang triangular nga kutay sa mga reef ug mga bato nahimutang 240 kilometros kasadpan sa nag-unang isla sa Luzon sa Pilipinas ug dul-an sa 900 kilometros gikan sa Hainan, ang labing duol nga teritoryo sa China.

Niadtong Martes, ang tigpamaba sa Chinese Foreign ministry nga si Lin Jian nagbutyag sa mga tigbalita nga ang China Coast Guard mihimo og “kinahanglang mga lakang” batok sa mga barko sa Pilipinas nga milapas na ang barko sa Pilipinas ug niabot na kini sa teritoryo sa Beijing.

Kini nga mga lakang “nahiuyon sa balaod, ug ang paagi sa pagdumala sa kahimtang propesyonal,” matud ni Lin, base sa mga transcript nga gipagawas sa embahada sa China sa Manila.