DAKBAYAN SA DABAW — Gi-aprubahan sa tagdumala sa Davao del Sur Electric Cooperative Inc. (Dasureco) ang P8-milyones nga alokasyon alang sa ilang “member-cosumer owners” (MCO) nga dunay binulang konsumo nga dili molabaw sa 30 kilowatts kada oras.
Si Dasureco OIC general manager Ferdinand Canastra nag-ingon sa Huwebes, Abril 23, nga ang maong inisyatibo sa kooperatiba, nga maghatag og duha ka bulan nga libreng elektrisidad, ginganlan og “Pantawid Liwanag Kuryente Mo, May Tabang ang Dasureco.”
Matud pa ni Canastra, ang programa pinasubay sa “Bayanihan to Heal as One Act” or Republic Act 11469 nga gipirmahan ni Pangulong Rodrigo Duterte sa miaging bulan aron sa pagbatok sa coronavirus disease (Covid-19) pandemik.
Ang resolusyon sa Dasureco board naghulagway sa P8-M nga alokasyon isip kabahin sa “social responsibility program” sa kooperatiba aron paghupay sa epekto sa pandemik sa ilang mga kabus nga kunsumidor.
“Ang maong pondo ihatag sa mga residential ‘lifeline’ consumer sa Dasureco nga nahisakop sa low-income sector nga nagkunsumo og dili molabaw sa 30-kilowatt-hour (KwH) matag bulan,” sigun ni
Canastra.
Hinuon, ang mga nagkunsumo og 30KwH ug pataas tagaan usab og 60 porsyento nga “lifeline discount” pinasubay sa balaod.
Base sa talaan sa Dasureco, adunay 53,000 ka mga MCO nga makabenepisyo sa maong programa ug sila dili na kinahanglang mobayad sa ilang bayranan para sa bulan sa Marso ug Abril.
“Kun ugaling nakabayad na sila para sa bulan sa Marso ug Abril, ang ilang gibayad i-consider namo nga advance payment para sa bulan sa Mayo ug Hunyo,” si Canastra nag-ingon.
Ang mga kunsumidor padad-an og mga “Pantawid Liwanag” coupon aron pagpamatuod nga sila kwalipikado sa maong programa.
Ang Dasureco ang nag-supply og kuryente sa Davao del Sur ug Davao Occidental. (LBG)
