DAVAO CITY –– Ang Davao City Government mipahigayon og upat ka mga programa sa pagrasyon og pagkaon sa mga lumolupyo human pagdeklarar sa enhanced community quarantine (ECQ) sa dakbayan.
Kini gipahibalo ni Mayor Sara Duterte-Carpio sa usa ka interbyu sa radyo niadtong Miyerkules, Abril 8.
Sumala pa sa mayor, ang upat ka programa mao ang rasyon nga gipasiugdahan sa City Social Welfare and Development Office (CSWDO), ang agri-food program sa City Agriculture Office ug City Vetenerarian’s Office, ang “hot meals on wheels” program,
ug ang padayong pagpanghatag og bugas sa mga kabarangayan.
Ang CSWDO dunay 350,000 food packs nga ipanghatag ug nahatag na ang 292,782 niini sa mga barangay.
“Wala ta’y distribution sa Good Friday. Ipadayon nato ang pagpanghatag karong Sabado,” ingon ni Mayor Sara.
Ang mga Dabawenyo nga wala’y ration cards tagaan sa agri-food card aron sila makadawat sa mga food pack nga dunay mga utanon, isda, itlog, karne, ug gatas.
Sa laing bahin, ang “hot meals on wheels” program nga pagadumalahan sa Barangay and Cultural Communities Affairs Division ipahigayon sa 98 ka barangay sa dakbayan.
Ang “hot meals” ipang apod-apod kada alas 10:00 sa buntag ug alas 5:00 sa hapon matag adlaw.
Nidugang ang mayor 100 ka sako nga bugas ang ilang gitagana sa matag 182 ka barangay sa dakbayan.
Iya usab giawhag ang mga hepe sa barangay nga mohimo og ilang kaugalingong community cooking alang sa ilang mga lumolupyo.
